ვიღაცას, ვინც ეს განცხადება დაწერა და მიიტანა სახელმწიფო დეპარტამენტში, აქვს სურვილი, რომ ქვეყანამ არ მიიღოს კანდიდატის სტატუსი, რომ შემდეგ, დეკემბერში სცადოს ქვეყანაში ვითარების არევა, – ამის შესახებ „ქართული ოცნების“ თავმჯდომარემ, ირაკლი კობახიძემ საქართველოს პირველი არხის გადაცემაში „აქტუალური შაბათი – მაკა ცინცაძესთან ერთად“ სტუმრობისას განაცხადა.
„მე ასეთი შთაბეჭდილება მრჩება. ყოველ შემთხვევაში, მცდელობა სწორედ ეს არის, აშკარად. როდესაც პოლარიზაციას აღვივებ და, შენი გადმოსახედიდან, ართულებ კანდიდატის სტატუსის მიღებას, სხვა რა ლოგიკური დასკვნა უნდა გამოვიტანოთ აქედან?“, – განაცხადა კობახიძემ.
მისივე თქმით, ხელისუფლების მიზანი არის კანდიდატის სტატუსის მიღება და ამისთვის ყველაფერს აკეთებს, თუმცა რადიკალური ოპოზიცია ქმნის ჭარბ მოლოდინებს, რომლის მიზანია, ჭარბი მოლოდინის პირობებში ქვეყანამ არ მიიღოს კანდიდატის სტატუსი და მერე ეს არეულობისთვის გამოიყენონ.
„ეს წამოსცდა ზურაბ ჯაფარიძეს და მერე, დღევანდელ ტრენინგზე „გირჩის“ წარმომადგენლებმა ეს დააკონკრეტეს. მათი სურვილია, დეკემბერში სცადონ სისხლიანი რევოლუციის მოწყობა. ეს სიტყვები იყო გამოყენებული, სისხლიანი რევოლუციის მოწყობა, როდესაც, მათი გათვლით, ევროკავშირი არ მოგვცემს კანდიდატის სტატუსს, მაგრამ როგორც შარშან ივნისში ჩავარდა მათი მიზნების განხორციელება, წელსაც ზუსტად ასევე იქნება. გამორიცხულია, რომ მათ შეძლონ თავიანთი მიზნების მიღწევა. საქართველოში შენარჩუნდება მშვიდობა, სიმშვიდე და მომავალშიც გვექნება ეკონომიკური წინსვლა“, – განაცხადა ირაკლი კობახიძემ.
