მოლდოვა ამზადებს პერსონალურ სანქციებს უკრაინაში რუსეთის ომთან დაკავშირებული პირების წინააღმდეგ. გავრცელებული ცნობით, გადაწყვეტილება, შესაძლოა, რამდენიმე კვირაში გამოცხადდეს.
ამის შესახებ მოლდოვის საგარეო საქმეთა მინისტრმა ნიკუ პოპესკუმ განაცხადა.
პოპესკუს სიტყვებით, მოლდოვა რუსეთის წინააღმდეგ დასავლეთის სანქციებს ეტაპობრივად უერთდება და რამდენიმე კვირაში გარკევული პირების მიმართ სანქციებს გამოაცხადებს.
„საუბარია ძირითადად შემოსვლის აკრძალვაზე, საბანკო ანგარიშებისა და აქტივების გაყინვაზე იმ ფიზიკური პირების, რომლებიც ამა თუ იმ ფორმით დაკავშირებულნი არიან უკრაინის წინააღმდეგ რუსეთის აგრესიასთან“, - თქვა პოპესკუმ.
მისი თქმით, გადაწყვეტილება უკვე მიღებულია, თუმცა გრძელდება მუშაობა იურიდიულ დეტალებზე.
პოპესკუს არ დაუსახელებია პირები, რომლებიც შესაძლოა, სანქცირებულთა სიაში მოხვდნენ, თუცა აღნიშნა, რომ საუბარია დაახლოებით 25 ადამიანზე, რომელთა შორის ნახევარზე მეტი რუსეთის მოქალაქეა.
მისივე თქმით, მარტის დასაწყისში ევროკავშირმა კიშინიოვს მოუწოდა შეუერთდეს ევროკავშირის მიერ დაწესებულ პერსონალურ სანქციებს უკრაინის წინააღმდეგ რუსეთის ომთან და ადამიანის უფლებების დარღვევასთან დაკავშირებით.
