სლოვაკეთის მთავრობამ რიგგარეშე ონლაინ-სხდომაზე უკრაინისთვის მიგ-29 ტიპის 13 გამანადგურებლის გადაცემის გადაწყვეტილება მიიღო.
ამის შესახებ პრემიერ-მინისტრმა ედუარდ ჰეგერმა პრესკონფერენციაზე განაცხადა.
ჰეგერის თქმით, მთავრობამ ერთხმად დაამტკიცა შეთანხმება უკრაინისთვის მიგ-29 ტიპის გამანადგურებლების გადაცემის შესახებ.
მისივე თქმით, თვითმფრინავები გამოყენებული იქნება უკრაინელების დასაცავად და არა თავდასხმისთვის.
სლოვაკეთი თვითმფრინავების სანაცვლოდ მოკავშირეებისგან კომპენსაციის სახით 900 მლნ ევროს მიიღებს.
სლოვაკეთმა გადაწყვეტილების შესახებ მას შემდეგ განაცხადა, რაც პოლონეთის პრეზიდენტმა ანჯეი დუდამ უახლოეს დღეებში უკარინაში ოთხი მიგ-29-ის გაგზავნა დააანონსა.
ამრიგად, უკრაინაში საბრძოლო თვითმფრინავებს ნატო-ს უკვე ორი სახელმწიფო აგზავნის.
