მსოფლიო ლიდერები გამოეხმაურნენ საბჭოთა კავშირის პირველი და უკანასკნელი პრეზიდენტის, მიხეილ გორბაჩოვის გარდაცვალებას.
"მიხეილ გორბაჩოვი იყო ლიდერი, რომელსაც ენდობოდნენ და პატივს სცემდნენ. მან გადამწყვეტი როლი ითამაშა ცივი ომის დასრულებასა და რკინის ფარდის დაცემაში. ამან გახსნა გზა თავისუფალი ევროპისკენ. ჩვენ არასოდეს დავივიწყებთ ამ მემკვიდრეობას", - დაწერა ევროკომისიის პრეზიდენტმა ურსულა ფონ დერ ლაიენმა ტვიტერზე.
აშშ-ის პრეზიდენტმა ჯო ბაიდენმა გორბაჩოვს იშვიათი ლიდერი უწოდა.
"როგორც სსრკ-ს ლიდერი, ის მუშაობდა (აშშ) პრეზიდენტ რონალდ რეიგანთან, რათა შეემცირებინა ორი ქვეყნის ბირთვული არსენალი და გაეადვილებინა ცხოვრება ხალხებისთვის მთელ მსოფლიოში, რომლებიც ლოცულობდნენ შეიარაღების შეჯიბრის დასასრულებლად. ათწლეულების განმავლობაში სასტიკი პოლიტიკური რეპრესიების შემდეგ, მან დემოკრატიული რეფორმები გაატარა", - თქვა ბაიდენმა განცხადებაში.
შეერთებული შტატების პრეზიდენტის თქმით, გორბაჩოვის ქმედებები დამახასიათებელი იყო "იშვიათი ლიდერისთვის". ლიდერი, რომელსაც აქვს საკმარისი "ფანტაზია, რათა დაინახოს განსხვავებული მომავალი და გამბედაობა, რომ მთელი თავისი კარიერა გარისკოს თავისი მიღწევებისთვის".
გორბაჩოვის გარდაცვალებას გამოეხმაურა დიდი ბრიტანეთის პრემიერ-მინისტრი ბორის ჯონსონი.
"დამამწუხრა გორბაჩოვის გარდაცვალების შესახებ ცნობამ, მე ყოველთვის აღფრთოვანებული ვიყავი იმ სიმამაცით და პატიოსნებით, რომელიც მან გამოიჩინა ცივი ომის მშვიდობიან დასრულებამდე", - წერს ჯონსონი.
გაეროს გენერალურმა მდივანმა ანტონიო გუტერეშმა "ღრმა მწუხარება" გამოთქვა მიხეილ გორბაჩოვის გარდაცვალების გამო. მისი თქმით, პატივს მიაგებს "იშვიათ სახელმწიფო მოღვაწეს, რომელმაც შეცვალა ისტორიის მიმდინარეობა".
"მან გააკეთა მეტი, ვიდრე ვინმე სხვამ ცივი ომის მშვიდობიანად დასასრულებლად", - თქვა გუტერეშმა და დასძინა, რომ ”მსოფლიომ დაკარგა დიდი ლიდერი, მულტილატერალიზმისადმი თავდადებული და მშვიდობისთვის დაუღალავი მებრძოლი”.
მიხეილ გორბაჩოვის გარდაცვალებას გამოეხმაურა საფრანგეთის პრეზიდენტი ემანუელ მაკრონი.
"მწუხარებას გამოვთქვამ მიხეილ გორბაჩოვის გარდაცვალების გამო, კაცისა, რომლის არჩევნამა გზა გაუხსნა რუსებს თავისუფლებისკენ. ევროპაში მშვიდობისკენ მისმა სწრაფვამ შეცვალა ჩვენი საერთო ისტორია", - დაწერა საფრანგეთის პრეზიდენტმა ემანუელ მაკრონმა ტვიტერზე.
შეგახსენებთ, მიხეილ გორბაჩოვი 30 აგვისტოს 91 წლის ასაკში ხანგრძლივი ავადმყოფობის შემდეგ გარდაიცვალა.
1985 წელს გორბაჩოვი გახდა საბჭოთა კავშირის კომუნისტური პარტიის გენერალური მდივანი. ის ასევე იყო სსრკ-ს პირველი და ერთადერთი პრეზიდენტი.
1990 წელს მიენიჭა ნობელის პრემია მშვიდობის დარგში. მას დასავლეთში აფასებდნენ ცივი ომის დასრულებაში შეტანილი წვლილისთვის.
