ქრისტიან-დემოკრატების ლიდერმა გიორგი თარგამაძემ საქართველოს პრეზიდენტს პარალმენტში გამართულ საგანგებო ბრიფინგზე ქვეყანაში შექმნილი ეკონომიკური მდგომარეობის შესახებ მიმართა.
"პრეზიდენტო, მოგიწოდებთ, ადეკვატურად შეაფასოთ არსებული საფრთხე და ყველაფერი გააკეთოთ, რათა წერტილი დაესვას მეწარმეთა დევნას და ბიუჯეტის შევსებას დაჭერილ ბიზნესმენებთან გაფორმებული საპროცესო შეთანხმებით, მივცეთ ქართველ დამსაქმებელს, განსაკუთრებით მცირე და საშუალო ბიზნესის წარმომადგენლებს, გადარჩენისა და განვითარების საშუალება. მხოლოდ ეს შეგვინარჩუნებს შანსს, რომ საბოლოოდ არ განადგურდეს საშუალო ფენა, რომელიც უნდა შექმნან ამ ქვეყნის დასაქმებულმა მოქალაქეებმა. თუ სახელმწიფო დაკარგავს ბიზნესს დღეს, მაშინ ხვალ აღარ იარსებებს არც ხელისუფლება და არც ოპოზიცია. ხვალ ჩვენ დავკარგავთ სახელმწიფოს", - აღნიშნა თარგამაძემ.
მისი შეფასებით, ქვეყანაში არსებული უმძიმესი სოციალური ფონი და უმუშევრობის მაღალი მაჩვენებელი არის შედეგი იმისა, რომ ქართული ბიზნესის წარმოება მოკლებულია გაფართოების ყოველგვარ საშუალებას, რადგან დაშინებული ბიზნესმენები აკონსერვებენ თავიანთ წარმოებას და გარბიან ქვეყნიდან.
"სახელმწიფოს მაკონტროლირებელი წნეხი სრულიად გამოუსადეგარს ხდის ჩვენი ქვეყნის ტერიტორიას ნებისმიერი ბიზნესის კეთებისთვის. მთავრობის ძალადობრივმა პოლიტიკამ სახელმწიფოს ყველაზე დიდი პარტნიორი, ბიზნესი, ყველაზე დიდ მტრად გადააქცია, რომლის ერთადერთ ამოცანას ადმინისტრაციული ორგანოების მარწუხებიდან თავის დაღწევა და უბრალოდ გადარჩენა წარმოადგენს", - აღნიშნა საპარლამენტო უმცირესობის ლიდერმა.
მისი შეფასებით, ქვეყანა უახლოვდება სოციალური კატასტროფის ყველაზე მძიმე ნიშნულს. ამიტომ გასატარებელია გადაუდებელი ღონისძიებები, რომლის შესახებაც ქრისტიან-დემოკრატები მზად არიან საკუთარი კონკრეტული წინადადებები წარმოადგინონ.
"ახლა არ არის შეცდომების ჯიუტად არაღიარების დრო. თქვენ, საქართველოს პრეზიდენტმა, უნდა მიიღოთ მთავარი პოლიტიკური გადაწყვეტილება და შეაჩეროთ სახელისუფლებო აგრესია ქართული ბიზნესის წინააღმდეგ", - აღნიშნავს თარგამაძე.
