საქართველოს პრეზიდენტმა მიხეილ სააკაშვილმა საზღვაო ადმინისტრაციის ყველა თანამშრომელი თანამდებობიდან გაათავისუფლა. საზღვაო ადმინისტრაციაში არსებულ პრობლემებს პროკურატურა გამოიძიებს.
დათხოვნის მიზეზი ქართველი მეზღვაურების ევროკავშირის ქვეყნების მიერ შავ სიაში შეყვანა და საქართველოს საზღვაო ადმინისტრაციაში არსებული პრობლემები გახდა. კერძოდ, ქართველი მეზღვაურებისთვის მიუწვდომელი ხდება ევროპულ გემებზე მუშაობა. ასევე, საზღვაო-სანაოსნო ორგანიზაციის რეკომენდაციით ევროკავშირის ქვეყნები ქართველ მეზღვაურებთან თანამშრომლობაზე უარს ამბობეს, რადგან საქართველოში გაცემულ დიპლომებს არ აღიარებენ.
დათხოვნის გადაწყვეტილება ანაკლიაში პრეზიდენტის პრემიერ-მინისტრთან, ეკონომიკისა და მდგრადი განვითარების მინისტრთან, ერთიანი სატრანსპორტო ადმინისტრაციის ხელმძღვანელთან და მთავრობის სხვა წარმომადგენლებთან შეხვედრისას გახდა ცნობილი.
სააკაშვილის თქმით, გამოძიებულ უნდა იქნას, რატომ ჩავარდა საქართველო ამ ვითარებაში.
"საზღვაო სფეროში სიტუაცია არის საკმაოდ მძიმე. წლების განმავლობაში ეს სფერო ინგრეოდა, 90-იან წლებში რაც გაკეთდა, ყველამ კარგად იცის და ეს შემდეგ გადაედო ყველა დონეს. რამდენიმე გაფრთხილების წერილი მივიღეთ. აქ არის 29 იანვარს ევროკავშირში ჩვენი ელჩის გამოგზავნილი წერილი, რომელიც გვაფრთხილებდა, რომ ჩვენი მეზღვაურები შეიძლება შეიყვანონ შავ სიაში. შემდეგ არის პირველი აპრილის წერილი, შემდეგ კიდევ ერთ თვეში მოვიდა გაფრთხილება. დღეს ათასობით ადამიანი შეიძლება დარჩეს ლუკმაპურისა და სამსახურის გარეშე. ეს არის ძალიან დიდი დარტყმა შავი ზღვის ეკონომიკაზე და კონკრეტული ადამიანების ოჯახებზე. მაინტერესებს ორი საკითხი: როგორ მოვედით აქამდე და როგორ უნდა გამოვასწორო|თ ვითარება. სახეზეა მინიმუმ უპასუხისმგებლობა და შეიძლება დანაშაულიც თანამდებობის პირებისა. საქმეს გამოიძიებს პროურატურა. საღვაო ადმინისტრაციის ყველა თანამშრომელი დათხოვნილი იქნას სამსახურიდან. ეს ხალხი არის პასუხისმგებელი ყველა იმ პრობლემაზე, რომლებიც ახლა არსებობს", - განაცხადა სააკაშვილმა.
როგორც ცნობილია, არსებული პრობლემები უცნობი იყო საქართველოს პრემიერ-მინისტრ ნიკოლოზ გილაურისთვის, რადგან ეკონომიკის ყოფილმა მინისტრმა მას ინფორმაცია არ მიაწოდა.
ამჯამად ქართული მხარე ბულგარულ მხარესთან აწარმოებს მოლაპარაკებებს, რათა ამ ქვეყანამ საქართველოს სტატუსის აღდგენის ინიცირება მოახდინოს
