თბილისი.25.11.10."ჯი-ეიჩ-ენი". საქართველოს მწვანეთა მოძრაობის ინფორმაციით, მათთვის ცნობილი გახდა, რომ საქართველოს სოფლის მეურნეობის სამინისტროს ლობირებთ ქვეყანაში ხორციელდება ჰიბრიდული სიმინდისა და ხორბლის სათესლე მასალის შემოიტანა და გავრცელება.
"ჩვენთვის უცნობია, გაიარა თუ არა აღნიშნულმა თესლებმა გამოცდა, რამდენად ეფექტური და მისაღებია ისინი ჩვენი რეგიონისთვის. ცნობილი გახდა, რომ აღნიშნული თესლების გავრცელება ხდება დაუშვებელი მეთოდებით. კერძოდ, მოსახლეობას (განსაკუთრებით საჯარო სამსახურში მყოფ პირებს) აიძულებენ შეიძინონ გარკვეული რაოდენობის სათესლე მასალა და დათესონ იგი საკუთარ მეურნეობებში. ჰიბრიდული ჯიშების ფართოდ გავრცელება დაუშვებელია როგორც ეკონომიკური, ისე სასოფლო-სამეურნეო და გარემოსდაცვითი თვალსაზრისით. ცნობილია, რომ ჰიბრიდული ჯიშები დაპირებულ “უხვ” მოსავალს მხოლოდ პირველ წელს იძლევა (ისიც თუ უხვად გავაჯერებთ სათესლე მასალის მომწოდებელი კომპანიის მიერ წარმოებული შხამ-ქიმიკატებით). მომდევნო წელს კი მისგან მიღებული მარცვალი სათესლე მასალად არ გამოდგება, ვინაიდან არ აქვს აღმოჩენების უნარი. ამდენად, გლეხი იძულებულია ყოველ წელს შეიძინოს სათესლე მასალა ჰიბრიდული თესლის მწარმოებელი კომპანიიდან. რაც არც ისე იაფია", - ნათქვამია მწვანეთა მოძრაბის მიერ გავრცელებულ ინფორაციაში.
მათი განმარტებით, წელს 1 კილოგრამი ჰიბრიდული სათესლე მასალის ფასი 10 ლარია.
"რა გახდება მისი ფასი მომდევნო წელს, არავინ იცის. საქართველოს მწვანეთა მოძრაობას მიაჩნია, რომ ყოვლად დაუშვებელია ჰიბრიდული სათესლე მასალის ფართოდ გავრცელება. იგი, პირველ რიგში, უნდა გადიოდეს გამოცდას და ითესებოდეს სპეციალურ საცდელ ფართობებზე. ჰიბრიდული სათესლე მასალის ფართოდ გავრცელების შემთხვევაში ქართველი გლეხები და ფერმერები დაკარგავენ მომავალი წლისთვის სათესლე მასალის შენახვის შესაძლებლობას და მთლიანად დამოკიდებულნი აღმოჩნდებიან სათესლე მასალის იმპორტიორ კომპანიებზე. დაიკარგება უნიკალური ქართული ჯიშები, რომლებიც უკეთ არის შეგუებული ადგილობრივ კლიმატურ პირობებს. აღსანიშნავია, რომ მსგავსი ქმედებები არაერთ ქვეყანაში განხორციელდა, რაც კვალიფიცირდა როგორც ეკონომიკური დივერსია", - აცხადებენ მოძრაობაში.
აღნიშნულიდან გამომდინარე, საქართველოს მწვანეთა მოძრაობა მოუწოდებს საქართველოს პარლამენტსა და მთავრობას, მეტი წინდახედულობა გამოიჩინონ ისეთი სასიცოცხლოდ მნიშვნელოვანი საკითხების გადაწყვეტისას, როგორიცაა საქართველოს სოფლის მეურნეობის აღმავლობაზე ზრუნვა და არ დაუშვან მისი მოქცევა ცალკეული უცხოური (ან თუნდაც ადგილობრივი) კერძო კომპანიების კონტროლისა და მმართველობის ქვეშ.