ჯანმრთელობის მსოფლიო ორგანიზაციის გენერალურმა დირექტორმა ტედროს ადჰანომ ღებრეიესუსმა საერთაშორისო საზოგადოება გააკრიტიკა მსოფლიოში მიმდინარე სასტიკის კონფლიქტების მიმართ არასათანადო ყურადღების გამო.
ღებრეიესუსის განცხადებით, საკითხავია, მსოფლიო ნამდვილად თანაბარ ყურადღებას აქცევს თუ არა შავკანიანთა და თეთრკანიანთა ცხოვრებას.
მისივე თქმით, რუსეთის უკრაინაში შეჭრა ნამდვილად გლობალური მნიშვნელობის პრობლემაა, მაგრამ აღნიშნა, რომ ეთიოპიაში, იემენში, ავღანეთსა და სირიაში მიმდინარე კონფლიქტებმა ვერ გამოიწვია ისეთი მასშტაბური შეშფოთება, როგორიც უკრაინაში გაჩაღებულმა ომმა, რომელიც ახლა მსოფლიო ყურადღების ცენტრშია.
„არ ვიცი, მართლა აქცევს თუ არა მსოფლიო თანაბარ ყურადღებას შავკანიანთა და თეთრკანიანთა ცხოვრებას. გასულ კვირას ვთქვი, რომ უკრაინისადმი მთელი ყურადღება ძალიან მნიშვნელოვანია, რა თქმა უნდა, რადგან ის გავლენას ახდენს მთელ მსოფლიოზე, მაგრამ მისი [ყურადღების] მცირე ნაწილიც კი არ ეთმობა ეთიოპიას, იემენს, ავღანეთს, სირიას და სხვებს“, - თქვა მან ჟენევაში გამართულ პრესკონფერენციაზე.
მან ასევე გააკრიტიკა პრესა ეთიოპიაში მიმდინარე სისასტიკეების დოკუმენტირების წარუმატებლობის გამო და აღნიშნა, რომ რეგიონში ხალხი ცოცხლად დაწვეს.
„არც კი ვიცი, ეს სერიოზულად იქნა მიღებული თუ არა მედიის მიერ. მინდა გულწრფელი ვიყო და ვთქვა, რომ მსოფლიო ყველა რასას ერთნაირად არ ექცევა. როგორც ჩანს, ზოგი უფრო თანასწორია, ვიდრე სხვები. მტკივა, როცა ამას ვამბობ, მაგრამ ამას ვხედავ. იმედია, სამყარო გონს მოეგება და თითოეული ადამიანის სიცოცხლეს თანაბრად დააფასებს“, - თქვა მან.
