პენტაგონის პრესსპიკერი ჯონ კირბი ადასტურებს რუსულ კრეისერ "მოსკვაზე" აფეთქებას, თუმცა არ ფლობს ცნობას, იყო თუ არა აფეთქების მიზეზი უკრაინის სარაკეტო დარტყმა. ამის შესახებ კირბიმ CNN-თან კომენტარისას განაცხადა.
"ბოლომდე დარწმუნებულები არ ვართ, რა მოხდა იქ. ჩვენი შეფასებით, კრეისერზე მოხდა სულ მცირე ერთი აფეთქება. საკმაოდ ძლიერი, რომელმაც "მოსკვას" მნიშვნელოვანი დაზიანება მიაყენა", - განაცხადა პენტაგონის წარმომადგენელმა.
ამასთან, კირბიმ აღნიშნა, რომ ხომალდი, სავარაუდოდ, თავისი ძალებით გადაადგილდება.
"ჩვენი შეფასებით, ხომალდს შეუძლია თავისი ძალებით გაადადგილდეს, და ეს ამას აკეთებს. კრეისერი მიემართება აღმოსავლეთისკენ. ვფიქრობთ, რომ მას სავარაუდოდ, სევასტოპოლში რემონტისთვის გააჩერებენ, თუმცა ჩვენ არ ვიცით, რისგან იყო ეს [აფეთქება] გამოწვეული", - განმარტა კირბიმ.
პენტაგონის მონაცემებით, "მოსკვა" ოდესიდან სამხრეთით 96 კმ-ში იმყოფებოდა სხვა რუსულ ხომალდებთან ერთად.
შეგახსენებთ, უკრაინულმა მხარემ გაავრცელა ინფორმაცია, რომ კრეისერს უკრიანული ნეპტუნის“ ორი რაკეტა მოხვდა და ცეცხლი გაუჩნდა.
კრეისერის დაზიანების შესახებ ინფორმაცია დაადასტურა რუსეთის თავდაცვის სამინისტრომაც, თუმცა უწყების განცხადებით, კრეისერის "სერიოზულად დაზიანება" საბრძოლო მასალების აფეთქებამ გამოიწვია. გავრცელებული ცნობით, კრეისერიდან ეკიპაჟის სრული ევაკუაცია განხორციელდა.
