აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ლევან ჩაკვეტაძე ყოველდღიურად ხვდება სხვადასხვა ქალაქსა და რაიონში ჩასახლებულ დევნილ მოსახლეობას და მათ მაქსიმალურად აწვდის ინფორმაციას ვაქცინაციის აუცილებლობაზე. ბუნებრივია, თავად მინისტრი ჩართულია კამპანიაში - „ ავიცრათ ერთმანეთისთვის“ და ამ კამპანიის მნიშვნელობაზე საუბრობს.
ლევან ჩაკვეტაძე: - როგორც მოგეხსენებათ, საქართველოს მთავრობის მიერ დაანონსდა კამპანია - „ავიცრათ ერთმანეთისთვის“, რომელშიც ჩართულები ვართ აფხაზეთის ავტონომიური რესპუბლიკის მთავრობა და, მთელი ქვეყნის მასშტაბით, განსაკუთრებით ე.წ. კომპაქტურ ჩასახლებებში, ვხვდებით ჩვენს დევნილებს, ვისმენთ მათ საჭიროებებს, მაქსიმალურად ვაწვდით ინფორმაციას იმ შესაძლებლობებზე, რაც ჩვენს ქვეყანაში არსებობს და ვთავაზობთ ამ სერვისებს.
აფხაზეთის ჯანდაცვის სამინისტროს თანამშრომლების 85% სრულად ვაქცინირებულია. მე „ფაიზერის“ ორივე დოზით ავიცერი საქართველოში შემოსვლისთანავე, ახლა კი „ბუსტერდოზის“ გაკეთების საშუალებაც მომეცა, გავიკეთე ამ თვის დასაწყისში „ბუსტერიც“. პანდემიის დასამარცხებლად ერთადერთი გზა ვაქცინაციაა, სწორედ ამიტომ მინდა მოვუწოდო გამყოფი ხაზის ორივე მხარეს მცხოვრებ მოსახლეობასა და თითოეულ ადამიანს, რომ გამოვიჩინოთ სოციალური პასუხისმგებლობა და ავიცრათ ერთმანეთის სიცოცხლის გადასარჩენად. მესმის, რომ ბევრს უჭირს ასაცრელად კლინიკაში მისვლა, ამიტომ ასეთი პირების ტრანსპორტირება ხორციელდება, ვეხმარებით, რომ მივიდნენ შესაბამის სტაციონარში და მათ მიერ შერჩეული ვაქცინით აიცრან. ყველამ ვიცით, რომ ქვეყანაში ყველა ვაქცინა ხელმისაწვდომია, ამიტომ არჩევანიც დიდია. მოსახლეობის აქტიურობა თავიდან არ იყო, ბევრი სკეპტიკურად უყურებდა ვაქცინაციას, ეს ალბათ სათანადო ინფორმაციის არქონამ განაპირობა, ამ ეტაპზე გააქტიურებულია მოთხოვნა, მსურველები არიან, მოიმატა მომართვიანობამ, რაც ძალიან კარგია. ვაქცინაციის ტემპის დაჩქარება დღეს უმთავრესი ამოცანაა, რომ ამ გზით დავიცვათ ადამიანების სიცოცხლე და ჯანმრთელობა.
- რამდენად ხელმისაწვდომია სერვისები ოკუპირებულ ტერიტორიაზე მყოფი მოსახლეობისთვის?
- ბოლო ორი დღეა, ძალიან გართულდა ეპიდვითარება აფხაზეთში. ყოველდღიურად 300- 400 ტესტირება ტარდება და ინფიცირებულთა მაღალი მაჩვენებელია. მაქსიმალურად ვცდილობთ ამ ადამიანების დახმარებას. რეკავენ „ცხელ ხაზზე“, როცა დახმარება სჭირდებათ და ოპერატიულად ხდება მათი გადმოყვანა ე.წ გამყოფი საზღვრიდან. ზოგადად, ოკუპირებული ტერიტორიებიდან ყოველდღიურად ან - ორ დღეში ერთხელ მაინც გადმოჰყავთ ინფიცირებულები, ეს საჭიროებაზეა დამოკიდებული. შემდეგ მათ ათავსებენ კლინიკებში იმის მიხედვით, თუ რა სიმძიმისაა პაციენტი და როგორია საწოლფონდი. ამიტომ არა მხოლოდ სამეგრელოში, არამედ იმერეთშიც ხდება მათი გადმოყვანა. თუ პაციენტს თანმხლები დაავადება აქვს და რთულია მდგომარეობა, შეიძლება თბილისშიც ჩამოიყვანონ. ნაწილდებიან პაციენტები საწოლფონდის მიხედვით, იმის მიხედვით, თუ სად რა საშუალებაა, რომ მაქსიმალურად გაეწიოთ სათანადო დახმარება.
- ხშირია ინფიცირებული ბავშვების შემთხვევები?
- ბავშვების ინფიცირების შემთხვევები არის და მათ პედიატრები ემსახურებიან. სხვადასხვა შემთხვევაა, არის ჩვილების დაინფიცირების შემთხვევებიც. ისინი გადმოგვყავს ქუთაისის ინტერვენციულ კლინიკაში, ან - თბილისში. ამ პროცესში ჩართულია სახელმწიფოს რამდენიმე უწყება. ხიდთან ხვდებიან ჩვენი ექიმები და რეანიმობილი ან სასწრაფო დახმარება და გადმოჰყავთ პაციენტები, სათანადო დახმარების გასაწევად. გალის რიონში მყოფ ექიმებთანაც გვაქვს კომუნიკაცია. რაც შეეხება ვაქცინაციას, რუხის სამედიცინო ცენტრის ექიმები ენგურზე განთავსებულ პუნქტში ახდენენ ოკუპირებული აფხაზეთიდან გადმოსული ჩვენი მოქალაქეების ვაქცინაციას. ოკუპირებული ტერიტორიებიდან გადმოდიან ჩვენი თანამოქალაქეები და იქვე სარგებლობენ ამ სერვისით. მათ აცრა ნებისმიერი ვაქცინით შეუძლიათ. არჩევანს თავად აკეთებენ, ასევე შეუძლიათ დარეგისტრირება მათთვის სასურველ კლინიკაში ან პოლიკლინიკაში და იქვე აცრის გაკეთებაც. აცრილებს თავისუფლად შეუძლიათ „მწვანე პასპორტის“ აღება. აუცილებელია გავუფრთხილდეთ საკუთარ თავს, ოჯახის წევრებს, ახლობლებს. ისეთ დროში ვცხოვრობთ, რომ უმნიშვნელოვანესია, თითოეულმა ადამიანმა გაითავისოს, რამდენად აუცილებელია ვაქცინაციის პროცესი. მით უმეტეს, ახალი შტამი შემოდის, „ომიკრონი“ უფრო სწრაფად ვრცელდება და ამიტომაც მნიშვნელოვანია ვაქცინის გაკეთება, ხოლო ვინც ორჯერ არის აცრილი - „ბუსტერით“ აცრაც, რომ მეტად იყოს დაცული. ღონისძიების ფარგლებში, დევნილებს ვაწვდით ინფორმაციას ვაქცინების და იმუნიზაციის მნიშვნელობის შესახებ, მათ ასევე გადაეცათ საინფორმაციო ბუკლეტები და სამედიცინო პირბადეები. მოსახლეობას ნებაყოფლობითი, ანტიგენზე დაფუძნებული სწრაფი ტესტირება და ვაქცინაცია მაღალკვალიფიციურმა ექიმ-სპეციალისტებმა ჩაუტარეს კიდეც. იმუნიზაციის ფართომასშტაბიანი კამპანია და ვაქცინაციის სააგიტაციო ღონისძიებები პანდემიასთან ბრძოლას ემსახურება და საქართველოს ყველა რეგიონში აქტიურად გაგრძელდება.
