ბათუმის საქალაქო სასამართლომ, ქობულეთში 14 წლის არასრულწლოვანზე ძალადობისა და მუქარის ბრალდებით დაკავებულ ბაბუას ერთი წლით თავისუფლების აღკვეთა მიუსაჯა.
გამოძიება სისხლის სამართლის კოდექსის 2 მუხლით მიმდინარეობდა. გადაწყვეტილება საქალაქო სასამართლოს მოსამართლემ თამარ ბეჟაშვილმა მიიღო და დაკავებულს 126-ე მუხლით დამნაშავედ ცნო.
გამოძიებით დადგინდა, რომ ბრალდებულმა თავისი არასრულწლოვანი შვილიშვილის მიმართ მუქარა და ძალადობა განახორციელა. 2006 წელს დაბადებულმა მოზარდმა მიმდინარე წლის 9 თებერვალს თვითმკვლელობა ჩაიდინა.
ოჯახური ნიშნით, წინასწარი შეცნობით არასრულწლოვნის მიმართ ჩადენილ მუქარის და ოჯახში ძალადობის ფაქტებზე გამოძიება საქართველოს სისხლის სამართლის კოდექსის 11 პრიმა-151-ე მუხლის მე-2 ნაწილის "გ" და "დ" ქვეპუნქტებით, ასევე, 126-ე პრიმა მუხლის მე-2 ნაწილის "ა" ქვეპუნქტით მიმდინარეობს.
ამ თემასთან დაკავშირებით, შინაგან საქმეთა სამინისტრომ კიდევ ერთი პირი დააკავა. თექვსმეტი წლის ასაკს მიუღწეველ არასრულწლოვანთან სექსუალური კავშირის დამყარებისა და თვითმკვლელობამდე მიყვანის ბრალდებით დაკავებულ, 1997 წელს დაბადებულ მამაკაცს წინასწარი პატიმრობა აქვს შეფარდებული", - ნათქვამია ინფორმაციაში.
14 წლის გოგონამ ქობულეთში სიცოცხლე თვითმკვლელობით 9 თებერვალს დაასრულა. გავრცელებული ინფორმაციით, მანამდე გოგონაზე ორჯერ სექსუალურად იძალადეს.
გოგონაზე სექსუალური ძალადობა გასული წლის დეკემბერში განხორციელდა.
სექსუალურად მოძალადე მოსამართლის განჩინებით, მხოლოდ გოგონას გარდაცვალების შემდეგ, 10 თებერვალს დააკავეს, პროკურატურამ ბრალი 12 თებერვალს წარუდგინა.
13 თებერვალს, ბათუმის საქალაქო სასამართლომ აღკვეთის ღონისძიების სახით მას პატიმრობა შეუფარდა.
გოგონას დედა, რომელის თურქეთიდან შვილის დაკრძალვამდე ერთი დღით ადრე დაბრუნდა, აცხადებს, რომ მოზარდი ნათესავებმა "უმოწყალოდ სცემეს".
