"ქართული პარტიის" ერთ-ერთი ლიდერი, სოზარ სუბარი 2007 წლის 7 ნოემბერს იხსენებს და განმარტავს, რომ ამ დღეს ხელისუფლება საკუთარ ხალხს საბოლოოდ გაემიჯნა. ასეთი ადამიანები კი, სუბარის თქმით, ხელისუფლებაში დიდხანს ვეღარ დარჩებიან. ამის შესახებ სუბარმა დღეს, პარლამენტის წინ მიმდინარე აქციაზე განაცხადა, სადაც 2007 წლის 7 ნოემბრისადმი მიძღვნილი მიტინგი გაიმართა.
"არ მეგონა თუ ვინმე კომუნისტურ 7 ნოემბერს დამავიწყებდა და ეს ამ ხელისუფლებამ გააკეთა. 7 ნოემბერი არის დღე, როდესაც ქართველმა ხალხმა გამრჯვება, ხოლო ხელისუფლებამ ფსევდო გამარჯვება მოიპოვა. 7 ნოემბერს ხელისუფლება საბოლოოდ გაემიჯნა საკუთარ ხალხს. საკუთარ ხალს გამიჯნული ადამიანები კი ხელისუფლებაში დიდხანს ვერ დარჩებიან", - განაცხადა სოზარ სუბარმა.
შეგახსენებთ, რომ 2007 წლის 7 ნოემბერს სამართალდამცველებსა და ოპოზიციის მომხრეებს შორის შეტაკება მოხდა, სადაც რამდენიმე ათეული ადამიანი დაშავდა. ხელისუფლებამ მომიტინგეების წინააღმდეგ ხელკეტები, რეზინის ტყვიები და ცრემლსადენი გაზი გამოიყენა.
