სომხეთში ვადამდელი საპარლამენტო არჩევნები დასრულდა. ქვეყანაში ყველა საარჩევნო უბანი თბილისის დროით 20 საათზე დაიხურა.
ცენტრალური საარჩევნო კომისიის მონაცემებით, ხმის მისაცემად საარჩევნო უნებში ამომრჩეველთა 49,4 პროცენტი გამოცხადდა.
კენჭისყრაში 21 პარტია და ოთხი ბლოკი მონაწილეობდა.
წინასწარი მონაცემები 21 ივნისს გამოცხადდება, საბოლოო შედეგები კი არჩევნებიდან მეშვიდე დღეს გახდება ცნობილი.
უნდა აღინიშნოს, რომ, დღევანდელ დღეს ინციდენტების გარეშე არ ჩაუვლია. სომხეთის საარჩევნო ბლოკის, „დემოკრატთა ალიანსის შირინიან-ბაბაჯანიანის“ წევრმა, დეპუტატმა არმან ბაბაჯანიანმა განაცხადა, რომ მის ავტომობილს ესროლეს.
მისი განცხადებით, გასროლის შედეგად დაზიანდა მანქანის საქარე მინა. პოლიტიკოსი მომხდარში ვადამდელი არჩევნების კონკურენტებს ადანაშაულებს.