სახმელეთო საზღვრების გახსნას და რეგულაციების შემსუბუქებას ტურისტული ბიზნესი იმედით უყურებს. სასტუმრო "ადამოს" გენერალური მენეჯერი ამბობს, რომ სახმელეთო საზღვრების გახსნის შემდეგ ქვეყანაში მინიმუმ მეზობელი ქვეყნებიდან ვიზიტორების შემოდინება დაიწყება და ქვეყნის ტურიზმიც გამოცოცხლებას დაიწყებს.
"რაც შეეხება საზღვრების გახსნას, ძალიან დიდი აქცენტი ტურიზმში ყოველთვის კეთდება სახმელეთო საზღვარზე, რაც იმას ნიშნავს, რომ უმოკლეს დროში შესაძლოა ვიზიტორი მოხვდეს ჩვენს ქვეყანაში, ჩვენს განთავსების ობიექტში.
ამის დამადასტურებლად არამხოლოდ გახსნილი სახმელეთო საზღვრები გამოდგება, არამედ საჰაერო, იმიტომ რომ ყველაზე პირველი ვიზიტორები ქვეყანაში არიან მეზობელი ქვეყნებიდან. აქედან გამომდინარე ლოგიკურია ჩვენი ვარაუდი, რომ ველოდებით სახმელეთო საზღვრების გახსნის შემდეგ უფრო მეტი ნაკადების შემოდინებას.
სახმელეთო საზღვრების შესაძლოა მარტივად იყოს გამტარი იმ ქვეყნებიდან წამოსული ვიზიტორების, რომლებიც ჩვენს საზღვრებს იყენებენ - ეს არის კავკასიის რეგიონი - ჩვენი საერთო ტურები სომხეთი, აზერბაიჯანი საქართველო. ასევე თურქეთი უდიდესი ჰაბია, როგორც საჰაერო ასევე სახმელეთო. ასე რომ ყველანაირი დასაბუთებული არგუმენტი გვაქვს, რომ აღნიშნული გადაწყვეტილება ჩვენთვის წარმატებული უნდა იყოს და პირველ რიგში შედეგის მომტანი", - აცხადებს სასტუმრო "ადამოს" გენერალური მენეჯერი მაია მახათაძე.
სასტუმრო ბიზნესი აცხადებს, რომ პანდემიამდე სხვა ვითარება იყო და განსაკუთრებით აქტიური იყო ჯგუფური ტურიზმი.
"დღეისათვის ჯგუფური ტურიზმი მოძლიერებული არ არის და გვესმის, რომ ჯგუფური გადაადგილება და ადამიანების თავშეყრა სასურველი არ არის. ამ ეტაპზე იკვეთება ინდივიდუალური ტურიზმის გამოცოცხლება. ამ ფონზე კი პანდემიამდე არსებულ სტატისტიკურ მაჩვენებლებს ჩამოვრჩებით. ჩვენ მკვდარი ბაზრის გაცოცხლება გვიწევს, როდესაც 2020 წლის ანალოგიურ პერიოდში გვქონდა სრული ნული. ამიტომ მკვდარი ბაზრის გაცოცხლების ფონზე დღეისათვის იდეალური შედეგები გაქვს. ჩვენს მაგალითზე მაისში წინა თვესთან შედარებით სრული 100%-იანი ზრდა დაფიქსირდა. რადგან მაისში მოისინჯა საქართველო როგორც ტურისტული მიმართულება მგონია, რომ ეს გაათამამებს დანარჩენ ვიზიტორებს, რომლებიც სამომავლოდ აპირებენ საქართველოში ჩამოსვლას სახმელეთო თუ საჰაერო მიმართულებებიდან", - განმარტავს "ადამოს" გენერალური მენეჯერი.
მაია მახათაძე აცხადებს, რომ 2019 წელს ძალიან ინტენსიურად დაიწყო ევროპული ბაზრის ათვისება და იმავდროულად ძალიან გაძლიერდა ისეთი ქვეყნები როგორიც იყო მალაიზია, ტაილანდი - უფრო ეგზოტიკური აზია. 2021 წლის ტურისტულ სეზონზე სამიზნე ორიენტირი ევროპა ვერ იქნება, რასაც ობიექტური ახსნა აქვს.
"ევროპული ხასიათი ვიცით, რომ ისინი წინასწარ გეგმავენ და წინასწარ აკეთებენ ჯავშნებს. უკვე გვიანია იმისთვის, რომ ევროპას ველოდოთ. სამაგიეროდ ევროპელი ტურისტების გააქტიურებას ველოდებით 2022 წელს. ამ ეტაპზე უფრო აქტიურია გალფის ქვეყნები [საუდის არაბეთი, ბაჰრეინი, არაბთა გაერთიანებული სამეიროები, კატარი, ომანი, ქუვეითი] და ამ მიმართულებაზე ვიქნებით ორიენტირებული. ზოგადად გალფის ქვეყნებიდან ვიზიტორები მშვიდობიან პერიოდშიც ბოლო წუთებში გეგმავს თავის მოგზაურობას. ეს მათთვის ახალი ხილი არ არის. რაც შეეხება დანარჩენ ქვეყნებს ინდივიდუალურად ვერგებით მათ მოთხოვნებს და ძირითად აქცენტებს მაინც 2022 წელზე ვაკეთებთ", - აცხადებს მაია მახათაძე.
სასტუმრო ბიზნესის წარმომადგენელი ამბობს, რომ ბიზნესი ზოგადად ორ სცენაზე აკეთებს გათვლას: პესიმისტური და ოპტიმისტური.
"მზად ვართ იმ სცენარისთვისაც, თუ არ გაამართლებს ინტენსიური ზრდის მოლოდინი და ზრდა ნელი ტემპით მოხდება. ღმერთმა ქნას და სიურპრიზების ეტაპზეც გადავიდეთ. ამიტომ მზად ვართ სუსტი ზრდისთვისაც. თუმცა რასაც ვუყურებთ მარტი, აპრილი, მაისის მონაცემებს მივდივართ საკმაოდ ჩქარი ზრდის დინამიკით, რაც დადებითად აისახება ჩვენს ბიზნესსზე", - ამბობს სასტუმრო "ადამოს" გენერალური მენეჯერი.
