საქართველოსა და ჩრდილოეთ მაკედონიას შორის ბიზნესურთიერთობების დიდი პოტენციალია. ბულგარეთის რესპუბლიკასა და ჩრდილოეთ მაკედონიის რესპუბლიკაში საქართველოს საგანგებო და სრულუფლებიანი ელჩი თამარ ლილუაშვილი ჩრდილოეთ მაკედონიის ეკონომიკის მინისტრს და ასევე ქვეყნის სავაჭრო პალატის თავმჯდომარეს შეხვდა.
როგორც ელჩმა სავაჭრო პალატის თავმჯდომარესთან შეხვედრის შემდეგ განმარტა, ქვეყნებს შორის დიპლომატიური ურთიერთობები მცირე ხნის წინ დამყარდა. აღნიშნული ურთიერთობების არქონა კი თავის მხრივ მხარეებს შორის ეკონომიკური თანამშრომლობის განვითარებასაც აფერხებდა
"სავაჭრო ბალანსი ძალიან მწირია და ბევრი სამუშაოა ჩასატარებელი მის გასაზრდელად. უპირველეს ყოვლისა, ორივე ქვეყანაში ერთმანეთის შესახებ ცნობადობის ასამაღლებლად და სამართლებრივი ბაზის შესაქმნელად, რომელიც გაამარტივებს საქმიან ურთიერთობებს. მქონდა ასევე შეხვედრა ეკონომიკის მინისტრთან, რომელიც გამოვიდა ორ ქვეყანას შორის სავაჭრო რეჟიმის ჩამოყალიბების წინადადებით. მიმაჩნია, რომ აღნიშნული მნიშვნელოვნად შეუწყობს ხელს ჩრდილოეთ მაკედონიასა და საქართველოს შორის ეკონომიკური ურთიერთობების განვითარებას", განაცხადა თამარ ლილუაშვილმა.
ჩრდილოეთ მაკედონიის სავაჭრო პალატის თავმჯდომარე ანტონ პეშევიც მიიჩნევს, რომ ქვეყნებს შორის სამართლებრივი ბაზა მნიშვნელოვანია, რაც ხელს შეუწყობდა ქვეყნებს შორის უფრო მჭიდრო ეკონომიკური თანამშრომლობის ჩამოყალიბებას. მისივე თქმით, ის საქართველოში ვიზიტით 2 წლის წინ იმყოფებოდა, ჩრდილოეთ მაკედონიაში საქართველოს შესახებ ცნობადობა მაღალი არ არის, თუმცა სწორი მუშაობის შედეგად ინტერესი გაჩნდება.
როგორც შეხვედრის შემდეგ გადაწყდა ორივე ქვეყნის სავაჭრო პალატების თანამშრომლობის ფარგლებში კომპანიებს შეეთავაზებათ ის ბენეფიტები რომელიც არსებობს და ურთიერთობებს გააღრმავებს.
"კარგი იქნება მცირე და საშუალო ბიზნესების დაკავშირება ერთმანეთთან, რათა მათ მოახერხონ ინფორმაციის მიღება ერთმანეთზე, შესაძლებლობებზე, გაცვალონ კონტაქტები და დაამყარონ პირველადი კომუნიკაცია. დღეს, პანდემიის პირობებში, არსებული შეზღუდვებიდან გამომდინარე, მგზავრობა და პირადი შეხვედრები შეზღუდულია, მაგრამ ეს დრო შეიძლება გამოყენებულ იქნას ონლაინ ფორმატში კომუნიკაციისთვის, რათა ვიდრე მიმოსვლა აღდგება, პირველადი კონტაქტი განხორციელებულ იქნას. შეგვიძლია, ორი სავაჭრო პალატის ხელმძღვანელობის და წევრთა შორის ZOOM-ის ფორმატში შეხვედრის ორგანიზება, რომლის ფარგლებშიც მოხდება ერთმანეთის გაცნობა და ინფორმაციის გაზიარება პალატების საქმიანობასა და შესაძლებლობების შესახებ", განაცხადა ელჩმა.
"სანამ საზღვრები ჩაკეტილია და ნიღბებით ვმოძრაობთ, რთულია რაიმე სახის ხელშესახები შედეგის მომტანი ქმედებების განხორციელება. თუმცა, პირველადი კომუნიკაციის დასამყარებლად და ინფორმაციის გაცვლისთვის ახლა მშვენიერი ეტაპია, სანამ სხვა, უფრო კონკრეტული ქმედებების განსახორციელებლად შეზღუდულები ვართ.
ჩვენი პალატა 100 წლის ხდება მომავალ წელს. ჩვენ ვართ ყველაზე დიდი სავაჭრო პალატა ჩრდილოეთ მაკედონიის რესპუბლიკაში, ქვეყანაში არსებული ბიზნესების და კომპანიების შესახებ ყველაზე დიდი საინფორმაციო ბაზით. ვფიქრობ, დაინტერესებული ქართველი პარტნიორებისთვის მნიშვნელოვანი ინფორმაციის მიწოდება და დახმარების აღმოჩენა შეგვიძლია", განაცხადა ანტონ პეშევიმ.
ჩრდილოეთ მაკედონიის რესპუბლიკაში საქართველოს საგანგებო და სრულუფლებიანი ელჩი თამარ ლილუაშვილი ამბობს, რომ ჩრდილოეთ მაკედონიის კომპანიებს შეუძლიათ ისარგებლონ იმ შესაძლებლობებით, რომლებსაც საქართველო იძლევა. კერძოდ, სატრანსპორტო ინფრასტრუქტურა ევროპა-აზიის დამაკავშირებელ გზაზე (პორტები, რკინიგზა), ასევე, სავაჭრო რეჟიმები ჩინეთთან, ინდოეთთან, სამხრეთ კორეასთან, რაც გასასვლელს იძლევა 2+ მილიარდიან აზიურ ბაზარზე.
