აშშ შეშფოთებას გამოთქვამს უკრაინის საზღვრებთან რუსული ჯარების გადაადგილების გამო.
ვაშინგტონი რუსეთისგან ახსნა-განმარტებას მოელის უკრაინის საზღვრებთან რუსი სამხედროებისა და ტექნიკის გადაადგილების გამო. ამის შესახებ აშშ-ის სახელმწიფო დეპარტამენტის ოფიციალურმა წარმომადგენელმა, ნედ პრაისმა განაცხადა.
"ნატოს მოკავშირეებთან ერთად განვიხილეთ ჩვენი შეშფოთება დაძაბულობის ზრდისა და ცეცხლის შეწყვეტის დარღვევის შესახებ და რუსეთს მივმართეთ განმარტებისთვის", - თქვა პრაისმა.
ამავე დროს, მან უარი თქვა, პასუხი გაეცა ჟურნალისტის კითხვაზე, იყო თუ არა რუსული ჯარების გადაადგილება უკრაინის საზღვრებთან კიევის დაშინების მცდელობა.
ჩემი საქმე არ არის ვისაუბრო იმაზე, თუ რა ამოძრავებს რუსეთს, ჩემი საქმეა ვისაუბრო იმაზე, თუ რას ფიქრობს აშშ-ს ადმინისტრაცია ამის შესახებ. ნება მიბოძეთ, ნათლად გითხრათ, ჩვენ შეშფოთებულები ვართ ბოლოდროინდელი რუსული აგრესიის ესკალაციით აღმოსავლეთ უკრაინაში. შეშფოთება ასევე ეხება სანდო ცნობებს რუსეთის ჯარების გადაადგილების შესახებ უკრაინის საზღვრებთან და ოკუპირებულ ყირიმში", - თქვა პრაისმა.
მისივე თქმით, რუსეთის ჯარების გადაადგილების შეფასება განსაკუთრებით მნიშვნელოვანია 2014 წლის მოვლენების [ყირიმის ანექსია] გათვალისწინებით.
მანამდე, კრემლის პრესსპიკერმა, დმიტრი პესკოვმა განაცხადა, რომ რუსეთის არმია საფრთხეს არ წარმოადგენს მსოფლიოს არც ერთი ქვეყნისთვის და თავის ტერიტორიაზე ეროვნული უსაფრთხოების ინტერესების გათვალისწინებით გადაადგილდება.
უკრაინის საზღვრებთან რუსეთის სამხედრო გააქტიურების გამო შეშფოთება გამოთქვა ევროკავშირმაც.