ევროკავშირის უმაღლესი წარმომადგენელი საგარეო და უსაფრთხოების პოლიტიკის საკითხებში, ჟოზეპ ბორელი უკრაინის საგარეო საქმეთა მინისტრს დმიტრო კულებას ტელეფონით ესაუბრა, სადაც მათ განიხილეს რუსეთის სამხედრო ქმედებები უკრაინის საზღვრის სიახლოვეს.
ბორელის განცხადებით, ევროკავშირი უკიდურესად შეშფოთებულია რუსეთის სამხედრო ძალების უკრაინის საზღვართან გადაადგილების გამო. მისივე თქმით, ევროკავშირი მტკიცედ უჭერს მხარს უკრაინის სუვერენიტეტსა და ტერიტორიულ მთლიანობას.
როგორც ჟოზეპ ბორელი აცხადებს, რუსეთის დესტაბილიზაციის გამომწვევი ქმედებების თაობაზე იმსჯელებენ ევროკავშირის საგარეო საქმეთა მინისტრების უახლოეს სხდომაზე, რომელშიც მონაწილეობას უკრაინაც მიიღებს.
ჟოზეპ ბორელთან საუბრის შემდეგ, უკრაინის საგარეო საქმეთა მინისტრმა მოკლე განცხადება გამოაქვეყნა სოციალურ ქსელში.
დმიტრო კულებას თქმით, რუსეთის მიერ სიტუაციის გამწვავების მცდელობების ფონზე, ბორელმა უკრაინის სუვერენიტეტისადმი მხარდაჭერა დაადასტურა და განაცხადა, რომ ევროკავშირი უკრაინის გვერდითაა.
ბოლო დღეების განმავლობაში, უკრაინის ხელისუფლება იუწყება, რომ მათი საზღვრების სიახლოვეს, შეინიშნება რუსეთის სამხედრო ძალების გადაადგილება და სამხედრო სწავლებების საბაბით საზღვართან შეიარაღებულ ძალებს კრებს. 1-ელ აპრილს უკრაინის პრეზიდენტმა, ვოლოდიმირ ზელენსკიმ რუსეთი უკრაინასთან საზღვარზე კუნთებით თამაშში დაადანაშაულა.
