დღეს, ჯანმრთელობის მსოფლიო ორგანიზაციის ვაქცინის უსაფრთხოების ექსპერტები სხდომას გამართავენ, რათა იმსჯელონ ასტრაზენეკას ვაქცინის უსაფრთხოებაზე მას შემდეგ, რაც ევროპის ზოგიერთმა ქვეყანამ შეაჩერა ამ პრეპარატით ვაქცინაციის პროცესი.
ევროპაში ასტრაზენეკას პრეპარატით ვაქცინირებულთა შორის რამდენიმე თრომბის შემთხვევა გამოვლინდა, თუმცა ექსპერტების მტკიცებით, ეს რაოდენობა ემთხვევა ზოგადად მოსახლეობაში დაფიქსირებულ მაჩვენებელს.
ვაქცინის უსაფრთხოებასთან დაკავშირებით სხდომა იგეგმება ასევე ევროპის მედიკამენტების სააგენტოში, რომელიც სავარაუდოდ ხუთშაბათს გამოაქვეყნებს დასკვნას ვაქცინაციის გაგრძელების შესახებ.
გასული კვირის მონაცემებით, ევროკავშირსა და დიდ ბრიტანეთში 17 მილიონმა ადამიანმა მიიღო ვაქცინის დოზა, საიდანაც თრომბი 40-ზე ნაკლებ შემთხვევაში აღირიცხა, დაფიქსირდა რამდენიმე გარდაცვალების შემთხვევაც.
ამ ფონზე, ევროპის რამდენიმე ქვეყანამ, მათ შორის გერმანიამ, საფრანგეთმა, იტალიამ, ნიდერლანდებმა, ნორვეგიამ, პორტუგალიამ, ესპანეთმა და ლატვიამ დროებით შეაჩერეს ასტრაზეკენას ვაქცინის გამოყენება.
ამასთან, ბელგიამ, პოლონეთმა, ჩეხეთმა, უკრაინამ, მექსიკამ, ავსტრალიამ განაცხადეს, რომ ისინი განაგრძობენ ამ პრეპარატის გამოყენებას.
ჯანმრთელობის მსოფლიო ორგანიზაცია და ევროპის მედიკამენტების სააგენტო ამ ეტაპზე ვერ ხედავენ კავშირს ვაქცინასა და თრომბის წარმოქმნას შორის და მოუწოდებენ სახელმწიფოებს, განაგრძონ ვაქცინაცია.
14 მარტს ვაქცინასთან დაკავშირებულ განვითარებულ მოვლენებს კომპანია ასტრაზენეკას წარმომადგენლებიც გამოეხმაურნენ.
ფარმაცევტული კომპანიის განცხადებით, 17 მილიონი ადამიანის უსაფრთხოების მონაცემების ყურადღებით განხილვამ აჩვენა, რომ ფილტვის ემბოლიის, ღრმა ვენების თრომბოზისა და თრომბოციტოპენიის გაზრდილი რისკის მტკიცებულება არ არსებობს.
მათივე მტკიცებით, ვაქცინირებულებს შორის თრომბის გაზრდილი რისკის შესახებ მტკიცებულება არც ერთ ასაკობრივ ჯგუფში არ გამოვლენილა.