შეერთებული შტატების წარმომადგენელთა პალატა აშშ-ის 45-ე პრეზიდენტის დონალდ ტრამპის იმპიჩმენტის მუხლს სენატს დღეს გადაუგზავნის.
წარმომადგენელთა პალატა ამერიკის 45-ე პრეზიდენტს ამბოხების წახალისება ედება ბრალად. 6 იანვარს ვაშინგტონში ტრამპის მომხრეები შეიკრიბნენ პრეზიდენტის მხარდასაჭერად. მოგვიანებით ისინი შეიჭრნენ აშშ-ის კონგრესის შენობაში და შეწყვიტეს სხდომა, რომელზეც უნდა დამტკიცებულიყო ქვეყანაში ჩატარებული საპრეზიდენტო არჩევნების შედეგები. პოლიციასთან შეტაკების დროს ხუთი ადამიანი დაიღუპა.
იმპიჩმენტის პროცესის დაწყებას სენატში 8 თებერვლიდან მოელიან.
იმისთვის, რომ სენატში პრეზიდენტის ბრალეულობა დამტკიცდეს, სენატის 2/3-ის თანხმობაა საჭირობა. ამ დროისთვის, სენატში არსებული მანდატი, თანაბრად არის განაწილებული (50-50) დემოკრატიულ და რესპუბლიკურ პარტიებს შორის. შესაბამისად, დემოკრატებს პროცესის ბოლომდე მისაყვანად 17 რესპუბლიკელი სენატორის მიმხრობა დასჭირდებათ.
იმპიჩმენტის პროცესის დამტკიცების შემთხვევაში, გზა გაეხსნება ახალი ინიციატივის წამოყენებას, რაც ტრამპისთვის მომავალში სამთავრობო თანამდებობის დაკავების აკრძალვას შეეხება. ასეთ შემთხვევაში, ამ აკრძალვის დასაწესებლად სენატის უბრალოდ უმრავლესობა საკმარისი იქნება.
წარმომადგენელთა პალატამ დონალდ ტრამპს იმპიჩმენტი 14 იანვარს გამოუცხადა. ტრამპი პირველი პრეზიდენტია ამერიკის ისტორიაში, რომელსაც იმპიჩმენტი ორჯერ გამოუცხადეს. პირველად წარმომადგენელთა პალატამ ტრამპს იმპიჩმენტი, უფლებამოსილების ბოროტად გამოყენებისთვის, 2019 წელს გამოუცხადა.
მიუხედავად იმისა, რომ 6 იანვრის კაპიტოლიუმზე იერიში არაერთმა რესპუბლიკელმა სენატორმა დაგმო, მათ შორის სენატის რესპუბლიკელთა ლიდერმა, წარსულში ტრამპის მტკიცე მხარდამჭერმა, მიჩ მაკკონელმა, ამ დროისთვის უცნობია, რომელი რესპუბლიკელი სენატორი მიემხრობა ყოფილი პრეზიდენტის იმპიჩმენტს.