Youtube-მა შეერთებული შტატების მოქმედი პრეზიდენტის დონალდ ტრამპის არხის მუშაობა ერთი კვირით შეზღუდა.
ამასთან, Youtube-ის ადმინისტრაციამ დონალდ ტრამპის ახალი ვიდეო ვებგვერდიდან წაშალა, რადგან არხმა დაარღვია წესები ძალადობის წახალისების შესახებ.
გავრცელებული ინფორმაციით, სულ მცირე 7 დღის განმავლობაში, პრეზიდენტის არხზე შეუძლებელი იქნება ახალი ვიდეოს ატვირთვა ან ლაივსტრიმინგი. აქამდე ატვირთული ვიდეოები კვლავ დარჩება ხელმისაწვდომი, თუმცა მათზე კომენტარების დატოვება შეუძლებელი იქნება.
კომპანიაში აღნიშნავენ, რომ ერთ კვირაში გადაწყვეტილებას გადახედავენ.
მანამდე, დონალდ ტრამპის ანგარიშები შეზღუდეს სხვა სოციალურმა ქსელებმაც.
7 იანვარს Twitter-მა დონალდ ტრამპს 12 საათით შეუზღუდა ანგარიშთან წვდომა. სოციალურმა ქსელმა ეს გადაწყვეტილება ვაშინგტონში, ტრამპის მხარდამჭერების კაპიტოლიუმში ძალადობრივი შეჭრის ფონზე მიიღო. მოგვიანებით, Twitter-მა სამუდამოდ დაბლოკა დონალდ ტრამპის ანგარიში.
დონალდ ტრამპის ანგარიშები განუსაზღვრელი ვადით დაბლოკა Facebook-მაც. დონალდ ტრამპის ანგარიშები ჩაკეტეს Twitch-მა და Snapchat-მა. Shopify- მა, Pinterest-მა, TikTok-მა და Reddit მა ასევე მიიღეს ზომები პრეზიდენტთან დაკავშირებული შინაარსის შეზღუდვის შესახებ.