თურქეთის პრეზიდენტი რეჯებ ტაიპ ერდოღანი ევროკავშირს მოუწოდებს, ბრექსიტის შემდეგ თურქეთი თავის რიგებში მიიღოს.
"ჩვენ უარი არ გვითქვამს ევროკავშირში გაწევრიანების განზრახვაზე. მზარდი გაურკვევლობა, რომელიც ბრექსიტმა მოიტანა, აღმოიფხვრება მხოლოდ მას შემდეგ, რაც თურქეთი გაერთიანებაში გაწევრიანდება", - თქვა ერდოღანმა.
თურქეთის პრეზიდენტმა გასული წლის ნოემბერში განაცხადა, თურქეთი მტკიცედ განაგრძობს ევროინტეგრაციის კურსს, რათა თავისი მომავალი ევროპასთან ერთად ააშენოს.
თურქეთმა ევროკავშირთან ასოცირების ხელშეკრულებას ხელი 1963 წელს მოაწერა. 1987 წელს კი შეიტანა განცხადება კავშირის წევრობის შესახებ. ამასთან, გაწევრიანების შესახებ მოლაპარაკებები მხოლოდ 2005 წელს დაიწყო და ევროკავშირსა და თურქეთს შორის უთანხმოების გამო არაერთხელ შეჩერებულა.
ამჟამად მოლაპარაკების დოსიეს 35 თავიდან 16 ღიად რჩება. 2016 წლის მარტში ბრიუსელმა გააქტიურა მოლაპარაკებები თურქეთის მხრიდან ევროპაში მიგრანტების ნაკადის შეჩერებაზე თანხმობის სანაცვლოდ.