სოციალურმა ქსელმა Twitter-მა სამუდამოდ დაბლოკა აშშ-ის მოქმედი პრეზიდენტის დონალდ ტრამპის ანგარიში "ძალადობის შემდგომი წაქეზების რისკის გამო".
კომპანიის განმარტებით, ტრამპის პოსტებმა კაპიტოლიუმის შტურმის შემდეგ შეიძლება განმეორებითი თავდასხმების რისკი გამოიწვიოს, მათ შორის ბაიდენის ინაუგურაციის დღეს.
"ტრამპის ანგარიშის ბოლოდროინდელი ტვიტების ყურადღებით შესწავლისა და მათი კონტექსტის საფუძვლიანი მიმოხილვის შედეგად, განსაკუთრებით, თუ როგორია მათი აღქმა და ინტერპრეტაცია "ტვიტერსა" და მის გარეთ, ჩვენ სამუდამოდ შევუჩერეთ ანგარიში ძალადობის შემდგომი გაღვივების რისკის გამო", - ნათქვამია Twitter-ის ადმინისტრაციის განცხადებაში.
მანამდე, 7 იანვარს Twitter-მა დონალდ ტრამპს 12 საათით შეუზღუდა ანგარიშთან წვდომა. სოციალურმა ქსელმა ეს გადაწყვეტილება ვაშინგტონში, ტრამპის მხარდამჭერების კაპიტოლიუმში ძალადობრივი შეჭრის ფონზე მიიღო.
დონალდ ტრამპის ანგარიშები განუსაზღვრელი ვადით დაბლოკა Facebook-მაც.