იუსტიციის სამინისტროში ტრეფიკინგის უწყებათაშორისი საბჭოს სხდომა გაიმართა. შექმნილი ეპიდემიოლოგიური ვითარების გათვალისწინებით, სხდომა ონლაინ რეჟიმში წარიმართა. სხდომას იუსტიციის მინისტრის მოვალეობის შემსრულებელი გოჩა ლორთქიფანიძე თავმჯდომარეობდა.
ღონისძიებაზე განიხილეს ტრეფიკინგის წინააღმდეგ ბრძოლის მიმართულებით 2020 წელს გატარებულ ღონისძიებათა ანგარიში და საერთაშორისო ორგანიზაციების (US TIP Report, GRETA, OSCE) შეფასებები სახელმწიფოს მიერ გაწეული საქმიანობის შესახებ.
იუსტიციის მინისტრის მოვალეობის შემსრულებელმა გოჩა ლორთქიფანიძემ სხდომაზე აღნიშნა, რომ ტრეფიკინგთან ბრძოლა იყო და რჩება იუსტიციის სამინისტროს და საქართველოს ხელისუფლების ერთ-ერთ მთავარ პრიორიტეტად. გოჩა ლორთქიფანიძემ ხაზი გაუსვა იმ ფაქტს, რომ იუსტიციის სამინისტრო მუდმივად ცდილობს, უწყების მიერ განხორციელებული ღონისძიებები იყოს თანამედროვე გამოწვევების საპირწონე, საერთაშორისო სტანდარტებთან შესაბამისი და ამ მხრივ აქტიურად თანამშრომლობს სტრატეგიულ პარტნიორ სახელმწიფოებთან, განსაკუთრებით, ამერიკის შეერთებულ შტატებთან; აგრეთვე, საერთაშორისო და ადგილობრივ არასამთავრობო ორგანიზაციებთან.
სწორედ ამ წარმატებული თანამშრომლობის შედეგია ის, რომ ტრეფიკინგის თემაზე ამერიკის შეერთებული შტატების 2020 წლის ანგარიშით, საქართველო ევროკავშირისა და დასავლეთ ევროპის არაერთი ქვეყნის გვერდით კვლავ ინარჩუნებს ადგილს ე.წ. პირველ კალათაში. გარდა ამისა, გასული წლების მსგავსად, წლევანდელ ანგარიშშიც აღმოსავლეთ პარტნიორობის სახელმწიფოებს შორის მხოლოდ საქართველო მოხვდა რეიტინგული სკალის უმაღლეს საფეხურზე. ეს ყოველივე საქართველოს ხელისუფლების მიერ ტრეფიკინგთან ბრძოლის წინააღმდეგ წარმატებით გატარებული პოლიტიკის შედეგია, რომელიც სრულად აკმაყოფილებს ამ ტრანსნაციონალურ ორგანიზებულ დანაშაულთან ბრძოლის სტანდარტებს. იუსტიციის მინისტრის მოვალეობის შემსრულებელმა აღნიშნა, რომ ამ შედეგის მიღწევა შეუძლებელი იქნებოდა საქართველოს ხელისუფლების კოორდინირებული და თანმიმდევრული პოლიტიკის გარეშე, რომლის ადმინისტრირებასაც სწორედ ტრეფიკინგთან ბრძოლის უწყებათაშორისი საბჭო ახორციელებს.
სხდომაზე განიხილეს კორონავირუსით გამოწვეული ეპიდემიოლოგიური ვითარება, რომელიც კიდევ უფრო ზრდის ადამიანით ვაჭრობის (ტრეფიკინგის) შემთხვევათა რისკებს, განსაკუთრებით, ონლაინ სივრცეში; ეს მდგომარეობა და არსებული გამოწვევები კი, მოითხოვს სახელმწიფოს მხრიდან მყისიერ და კოორდინირებულ მიდგომას და მოქმედებებს.
ტრეფიკინგთან ბრძოლის საბჭოს მდივანმა, საერთაშორისო საჯარო სამართლის დეპარტამენტის უფროსმა, ქეთევან სარაჯიშვილმა საბჭოს წევრებს წარუდგინა ადამიანით ვაჭრობის (ტრეფიკინგის) წინააღმდეგ ბრძოლის ახალი, 2021-2022 წლების სამოქმედო გეგმა, რომელიც დაამტკიცა საბჭომ. სამოქმედო გეგმის შემუშავების პროცესშიც გათვალისწინებულ იქნა საერთაშორისო პარტნიორების, ადგილობრივი არასამთავრობო და საერთაშორისო ორგანიზაციების რეკომენდაციები და შემოთავაზებები.
საბჭოს სდომაზე დამსწრე აუდიტორიას ასევე მიმართეს შინაგან საქმეთა მინისტრის მოადგილემ ნინო ცაციაშვილმა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ თამილა ბარკალაიამ. უწყებათაშორისი საბჭოს სხდომის მუშაობაში მონაწილეობდნენ, ასევე, გენერალური პროკურორის; საგარეო საქმეთა მინისტრის; განათლების, მეცნიერების, კულტურისა და სპორტის; ეკონომიკისა და მდგრადი განვითარების მინისტრების მოადგილეები; სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს, საქართველოში ევროკავშირის დელეგაციის, გაერო-ს ბავშვთა ფონდის, აშშ-ის საელჩოს და მიგრაციის საერთაშორისო ორგანიზაციის წარმომადგენლები.
