იმედი გვაქვს, თებერვალში ზამთრის კურორტებზე ჩვენს მოქალაქეებსა და ტურისტებს ეფექტურად ვუმასპინძლებთ. აცხადებს "ქართული ოცნების" საპარლამენტო სიის წევრი, ტურიზმის ეროვნული ადმინისტრაციის ხელმძღვანელი მარიამ ქვრივიშვილი.
მისი თქმით, რთული იყო ზამთრის კურორტების დახურვის გადაწყვეტილების მიღება, თუმცა "გვიწევს მაქსიმალურად დავუჯეროთ ჩვენს ეპიდემიოლოგებს და ჯანდაცვის ექსპერტებს".
"გადაწყვეტილება იქნა მიღებული, რომ ორი თვის განმავლობაში საბაგიროების და უშუალოდ კურორტების ოპერირება არ მოხდეს, რაც ბუნებრივია ძალიან რთულია. კარგად გვესმის, რომ ძალიან რთულია ამ კურორტებზე არსებული სასტუმროებისთვის, განთავსების იბიექტებისა თუ სარესტორნო ბიზნესებისთვის. თუმცა ჩვენ გვაქვს პოზიტიური მოლოდინები, რადგან იანვრის ბოლომდე გრძელდება ეს შეზღუდვები და იმედი გვაქვს, რომ წლის დასაწყისიდან, ფაქტობრივად თებერვლიდან ჩვენი კურორტები კვლავ მზად იქნება. იმედი გვაქვს, ეპიდემიოლოგიური მდგომარეობა და ყველაფერი ის, რასაც ჩვენს საზოგადოებასთან ერთად გავაკეთებთ, იმის საშუალებას მოგვცემს, რომ ჩვენს ზამთრის კურორტებზე ჩვენი ქვეყნის მოქალაქეებს, ასევე საერთაშორისო მოგზაურებს კიდევ უფრო ეფექტურად ვუმასპინძლოთ", - განაცხადა ქვრივიშვილმა.
