გაერო-ს უშიშროების საბჭოს 8 წევრი ქვეყანა - აშშ, გერმანია, საფრანგეთი, ბელგია, ესტონეთი, ბრიტანეთი, ირლანდია, ნორვეგია - რუსეთს საქართველოს დეოკუპაციისკენ მოუწოდებს და ერთობლივ განცხადებას ავრცელებ.

"ამ კვირას 12 წელი გავა 2008 წლის აგვისტოდან, რუსეთ-საქართველოს შორის კონფლიქტის დაწყებიდან.

ჩვენ ვიხსენებთ იმ ადამიანებს, ვინც შეეწირნენ ამ კონფლიქტს და დაკარგეს თავიანთი საცხოვრებელი სახლები და ვწუხვართ, რომ 2008 წლის 12 აგვისტოს და 8 სექტემბრის შეთანხმებების მხოლოდ მცირე წინსვლის გამო.

ჩვენ მტკიცედ ვუჭერთ მხარს საქართველოს დამოუკიდებლობას, სუვერენიტეტს და ტერიტორიულ მთლიანობას მის საერთაშორისო დონეზე აღიარებულ საზღვრებში.
რუსეთის მუდმივი სამხედრო ყოფნა აფხაზეთისა და სამხრეთ ოსეთის ქართულ რეგიონებში, ისევე როგორც რუსეთის მიერ ამ რეგიონების ე.წ. დამოუკიდებლობის აღიარება არღვევს საქართველოს ტერიტორიულ მთლიანობას და ძირს უთხრის საქართველოს სუვერენიტეტსა და საერთაშორისო სამართლის ნორმებს.

ეს კიდევ უფრო მეტად ჰყოფს საზოგადოებებს და საფრთხეს უქმნის კონფლიქტით დაზარალებული მოსახლეობის ჯანმრთელობას და სიცოცხლეს.

ჩვენ უკიდურესად შეშფოთებული ვართ ბოლო ერთი წლის განმავლობაში ე.წ. „ბორდერიზაციის პროცესის” გააქტიურებით, მათ შორის COVID-19 გლობალური პანდემიის დროს.

ამ რთულ დროში, დე-ფაქტო ხელისუფლებები აგრძელებენ მოქალაქეთა თვითნებური დაკავებებს ადმინისტრაციული საზღვრის გასწვრივ.

სამხრეთ ოსეთის დე ფაქტო ხელისუფლებამ არაერთხელ უარყო სასწრაფო სამედიცინო დახმარების საჭიროების მქონე ადამიანების გადმოყვანა და ჰუმანიტარული დახმარების შეტანა.

ჩვენ ასევე შეშფოთებული ვართ რუსეთის მიერ წარმოებული დეზინფორმაციის კამპანიის შესახებ პანდემიის და მასთან დაკავშირებული ჯანმრთელობის საკითხების, ასევე ლუგარის ცენტრზე ყალბი პროპაგანდის გამო.

ეს მოქმედებები ახდენს კონფლიქტის გახანგრძლივებას, საფრთხეს უქმნის მშვიდობასა და სტაბილურობას, ხელს უშლის ადამიანის უფლებების და ძირითადი თავისუფლებების განხორციელებას და უარყოფითად აისახება ხალხის ჯანმრთელობასა და უსაფრთხოებაზე საქართველოს მასშტაბით და რეგიონის დესტაბილიზაციას ახდენს.

დღეს ჩვენ კვლავ მოვუწოდებთ რუსეთის ფედერაციას სრულად შეასრულოს 2008 წლის 12 აგვისტოსა და 8 სექტემბრის შეთანხმებებით გათვალისწინებული ვალდებულებები და პირობები.

12 აგვისტოს ექვსპუნქტიანი გეგმა ავალდებულებს რუსეთს, თავისი შეირაღებული ძალები კონფლიქტამდელ პოზიციებს დაუბრუნოს.

ჩვენ კიდევ ერთხელ ვადასტურებთ ჩვენს მხარდაჭერას ადამიანის უფლებებისადმი პატივისცემისა და დაცვის, მათ შორის იძულებით გადაადგილებულ პირთა უფლებების ჩათვლით, აგრეთვე საერთაშორისო სამართლის შესაბამისად, მათი უსაფრთხო, ნებაყოფლობით, ღირსეულად და უშფოთველად დაბრუნების შესაძლებლობების მნიშვნელობას.

ჩვენ მტკიცედ ვუჭერთ მხარს საქართველოში კონფლიქტის მშვიდობიანი გზით მოგვარების საკითხს და ყველა მხარეს ვუწოდებთ, რომ გააორმაგონ ძალისხმევა ჟენევის საერთაშორისო დისკუსიებში", - ნათქვამია განცხადებაში.