საქართველოს საგარეო საქმეთა სამინისტრო თურქეთიდან საქართველოს ოთხი მოქალაქის დაკავებისა და დეპორტაციის ფაქტს ადასტურებს. ამის შესახებ დრეს გამართულ პრესკონფერენციაზე საგარეო საქმეთა მინისტრის მოადგილემ ნინო კალანდაძემ განაცხადა.
"დაკავების და დეპორტაციის ფაქტი დადასტურებულია, მაგრამ რა გარემოებები ედო ამ ეტაპზე ძნელი სათქმელია. თუმცა, შემიძლია სრული პასუხისმგებლობით გითხრათ, რომ არავითარ არაორდინალურ საკითხს ადგილი არ ჰქონია", - აღნიშნა კალანდაძემ და აქვე დასძინა, რომ ეს ჩვეულებრივი არალეგალური მოქმედება იყო, რომელსაც სხვა ქვეყნის მოქალაქეები ახორციელებენ, მათ შორის საქართველოსიც.
შეგახსენებთ, რომ თურქულმა მხარემ ქალაქ ტრაბზონში დაკავებული 4 ქართველის დეპორტაცია უკვე მოახდინა.
შემთხვევა 2 დღის წინ მოხდა. ეროვნებით სომეხი გუარ კარაკოსიანი, დამნაშავეების ჯგუფთან ერთად თურქეთში ქართველი და სომეხი ეროვნების ქალების სექსუალურ ექსპლუატაციას ეწეოდა. დამნაშავეების ჯგუფი თურქეთში ქალაქ ტრაბზონში აიყვანეს. ქართველებთან ერთად ისინი სომეხი ქალების ტრეფიკინგითაც იყვნენ დაკავებულები. ჯგუფის ხელმძღვანელი გუარ კარაკოსიანი ტრეფიკინგისათვის არის ძებნილი. როგორც ცნობილია, დანაშაულებრივ ჯგუფს პოლიცია მფარველობდა. სულ დაკავებულია 18 პირი.
