საქართველოს პრეზიდენტი სალომე ზურაბიშვილი წუხილს გამოთქვამს აზერბაიჯანისა და სომხეთის საზღვარზე მომხდარი შეიარაღებული დაპირისპირების გამო. ინფორმაციას პრეზიდენტის ადმინისტრაცია ავრცელებს.
"დღეს, როცა ყველა ერთად ვიბრძვით უხილავი მტრის წინააღმდეგ, უდიდესი მნიშვნელობა აქვს საერთაშორისო სოლიდარობას და გლობალური სტაბილურობის შენარჩუნებას.
ჩვენი რეგიონის მშვიდობა და უსაფრთხოება მნიშვნელოვანია როგორც საქართველოს, ასევე, ჩვენი მეგობარი და პარტნიორი სახელმწიფოების - აზერბაიჯანისა და სომხეთის მომავალი განვითარებისა და კეთილდღეობისათვის.
საქართველოს პრეზიდენტი იმედს გამოთქვამს, რომ საჭირო ზომები დროულად იქნება მიღებული და მშვიდობიანი მოლაპარაკებების გზით მოხდება ვითარების შემდგომი ესკალაციის თავიდან აცილება", - ნათქვამია განცხადებაში.
შეგახსენებთ, 12 ივლისს, შეიარაღებული დაპირისპირება მოხდა სომხეთსა და აზერბაიჯანის საზღვრაზე, თოვუზის რაიონში.
აზერბაიჯანის თავდაცვის სამინისტრომ განაცხადა, რომ სომხურმა სამხედრებმა მის პოზიციებს ცეცხლი გაუხსნეს.
სომხეთის თავდაცვის სამინისტრომ თავის მხრივ განაცხადა, რომ აზერბაიჯანელი სამხედროები არტილერიის გამოყენებით სომხური პუნქტის დაკავებას შეეცადნენ.
ბაქოს ინფორმაციით, დაიღუპა ოთხი აზერბაიჯანელი სამხედრო. სომხური მხარე იტყობინება, რომ დაჭრილია ორი პოლიციელი და მათ მხარეს მსხვერპლი არ არის.
ერევნის განცხადებით, სროლა დღესაც გრძელდებოდა და აზერბაიჯანელი სამხედროები სომხეთის ტერიტორიას პერიოდულად 15-20 წუთით ესროდნენ. აზერბაიჯანი და სომხეთი სიტუაციის გამწვავებაში ერთმანეთს ადანაშაულებენ.
