პირველი, რაც უნდა გავაკეთოთ, ვასწავლოთ ქართველებს, რომ დაისვენონ საქართველოში. ამის შესახებ საქართველოს პრემიერ-მინისტრმა გიორგი გახარიამ, ქუთაისის, ტურიზმის სექტორთან გამართულ შეხვედრაზე განაცხადა.
მისი თქმით, წელს საქართველოს მოსახლეობა შიდა ტურიზმზე უნდა იყოს ორიენტირებულნი, რადგან კორონავირუსის პანდემიის ფონზე, მოქალაქეები საზღვარგარეთ დასასვენებლად წასვლას ვერ შეძლებენ.
"მოგეხსენებათ, რომ პირველ ეტაპზე გაიხსნება შიდა ტურიზმი და დარწმუნებული ვარ, რომ შიდა ტურიზმიც საკმაოდ სერიოზულ მოთხოვნას დააგენერირებს იმიტომ, რომ დღეს ფაქტია, რომ ქართველები საზღვარგარეთ დასასვენებლად ვერ წავლენ და ბოლო რამდენიმე წელია ძალიან შეუყვარდათ იქ, არ ვიტყვი ახლა სად სიარული, ვიღაცას რომ არ ვაწყენინო.
ამიტომ პირველი რაც უნდა გავაკეთოთ, უნდა ვასწავლოთ ქართველებს, რომ დაისვენონ საქართველოში და ფული გადაიხადონ ტურიზმში საქართველოში. იქ ნათესავთან ჩავედი თუ ბებიასთან, ესეც ტურიზმია, შიდა ტურიზმია და აქაც უნდა ვიცოდეთ, რომ ამას თავისი ეკონომიკური ძალა აქვს. ამაზე სწრაფად უნდა ავკრიფოთ, სწრაფად უნდა ვისწავლოთ, რაღაც სტანდარტები უნდა დავაკმაყოფილოთ და შემდგომ უკვე მზად უნდა ვიყოთ იმისთვის, რომ უცხოეთიდან სტუმრები მივიღოთ", - განაცხადა პრემიერ-მინისტრმა.