პარლამენტი "საზოგადოებრივი ჯანმრთელობის შესახებ" კანონში ცვლილებების პროექტის განხილვას იწყებს. ინიციატივის თანახმად, მთავრობას ქვეყანაში შეზღუდვების გატარება საგანგებო მდგომარეობის გამოცხადების გარეშეც შეეძლება. უმრავლესობა ოპოზიციის კრიტიკას არ იზიარებს და აცხადებს, რომ რისკები არსებობს, თუმცა პარლამენტს აქვს უნარი ეს რისკები დააზღვიოს.
პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიიჩნევს, რომ ოპოზიციის კრიტიკას ყურადღება არ უნდა მიექცეს:
"ძალიან იშვიათად მახსოვს რომელიმე კანონპროექტი, რომელზეც ოპოზიციას დაეჭიროს მხარი. ჩვენ ამას ოპოზიციისგან მიჩვეული ვართ, ახალი არაფერია, რაც არ უნდა იდეალური კანონპროექტი შემოვიტანოთ, ოპოზიციას ყოველთვის ერთი და იგივე პასუხი აქვს. მე მგონი ამას ყურადღება არ უნდა მივაქციოთ. ჩვენთვის მთავარია რას იტყვის ჩვენი საზოგადოება და ამ საზოგადოებას უნდა გავუწიოთ ანგარიში," - აღნიშნა სოფო კილაძემ.