"გამარჯვებული საქართველოს" ლიდერის ირაკლი ოქრუაშვილის საქმეზე მოსამართლემ, შესაძლოა, განაჩენი დღეს გამოიტანოს. საქმე 20-21 ივნისის აქციების ეპიზოდს ეხება. ოქრუაშვილის ადვოკატი მამუკა ჭაბაშვილი კიდევ ერთხელ საუბრობს საქმის აბსურდულობაზე და ყურადღებას პოლიტიკურ მოტივებზე ამახვილებს.
"დღეს დაცვის მხარე ვამბობთ დასკვნით სიტყვას და სასამართლო გადის სათათბიროდ. შეიძლება, დღესვე გამოგვიცხადოს განაჩენი. არცერთი კადრი, ფაქტი, არცერთი მოწმის ჩვენება, მათ შორის პოლიციელების, არ აჩვენებს, რომ ირაკლი ოქრუაშვილს ვინმესთან კონტაქტი ჰქონოდა. ცალსახაა, რომ გამამართლებელი განაჩენი უნდა იყოს, თუმცა თუ სამართლებრივად შევხედავთ, ბრალდებაც არ უნდა წაეყენებინათ და აქამდეც არ უნდა მოვსულიყავით,"- განაცხადა რუსთავი 2-თან საუბრისას მამუკა ჭაბაშვილმა.
შეგახსენებთ, "გამარჯვებული საქართველოს" ლიდერს ირაკლი ოქრუაშვილს 20 ივნისის აქციაზე ჯგუფური ძალადობის ორგანიზებას, ხელმძღვანელობას და მასში მონაწილეობას ედავებიან. თავდაცვის ყოფილი მინისტრი წარდგენილ ბრალს არ აღიარებს.
