საქართველოს პრეზიდენტი სალომე ზურაბიშვილი ცხინვალის საოკუპაციო რეჟიმის მიერ ე.წ. საზღვრის ჩაკეტვას მიკრობლოგ "ტვიტერზე" ეხმიანება.
"ახალგორის გამშვები პუნქტის ჩაკეტვა კიდევ ერთი მაგალითია ადამიანის უფლებების დარღვევისა ოკუპირებულ ცხინვალის რეგიონში. გადაადგილების უფლება არის ფუნდამენტური უფლება, რომელიც უნდა იქნას დაცული.
მოვუწოდებ საერთაშორისო საზოგადოებას, ზეწოლა მოახდინონ ყველა პასუხისმგებელ მხარეზე, რათა გაიხსნას გამშვები პუნქტები", - წერს სალომე ზურაბიშვილი.
საოკუპაციო რეჟიმის წარმომადგენლებმა ახალგორის ე.წ. გადასასვლელი დღეს დილიდან ისევ ჩაკეტეს.
ახალგორის ე.წ. გადასასვლელის შესაძლო ჩაკეტვაზე, ინფორმაცია გუშინ, მუნიციპალიტეტის გამგებელმა, ნუგზარ თინიკაშვილმა გაავრცელა. მან ჟურნალისტებთან საუბრისას აღნიშნა, რომ საოკუპაციო რეჟიმის მიერ დაწესებული ვადა ამოწურულია.
შეგახსენებთ, რომ ოკუპირებული ცხინვალის რეგიონის დე ფაქტო ხელისუფლებამ ახალგორთან გადასასვლელი მოსახლეობას 5-თვიანი იზოლაციის შემდეგ 24 იანვარს გაუხსნა.
