"მთავარი კითხვა რაც ისმის - დააზარალა თუ არა სანქციებმა ქართული ავიაბაზარი, პასუხი ერთმნიშვნელოვნად არის - დიახ, დააზარალა", - აცხადებს ავიაციის სექტორის წარმომადგენელი თამუნა თანდაშვილი.
თანდაშვილის თქმით, კრიზისი რომ არ მომხდარიყო ქვეყანას ბევრად უკეთესი მაჩვენებლები ექნებოდა.
"რამდენად დააზარალა, როგორ უპასუხა კრიზისს კერძო და საჯარო სექტორმა ამას ციფრებში და დინამიკაში ვხედავთ. საავიაციო სფერო, მისი სტრატეგიული ფუნქციებიდან გამომდინარე მგრძნობიარეა მიმდინარე პოლიტიკურ მოვლენებთან მიმართებაში. უსაფრთხოება და ქვეყნის სტაბილური განვითარება პირდაპირ პროპორციულია საერთაშორისო ავიამიმოსვლის განვითარების ტემპთან.
გასული წლის სტატისტიკურ მაჩვენებლებზე დაყრდნობით, რომ არა რუსული კრიზისი და ავიასანქციები, უფრო დიდი ზრდა გვექნებოდა ციფრებში. ზრდა გვაქვს, თუმცა შენელებული სახით. ის რომ კერძო და სახელმწიფო სექტორები საერთო სიბრტყეზე მოქმედებენ და სხვადასხვა წერტილოვან გათვლებს აკეთებენ, დადებითი პროცესია. EBRD-ს დასკვნა ადასტურებს ამ ტენდენციას. საქართველო არ არის გამონაკლისი, მეზობელ თურქეთში სადაც ავიასექტორი ასჯერ უფრო მეტად არის განვითარებული, პოლიტიკური კრიზისისას მკვეთრად უარესდება ავიამიმოსვლის ტემპი და სტატისტიკურ მონაცემებში ვხედავთ სწრაფ ვარდნებს.
ციფრებში ზრდის დინამიკაა, მაგრამ კიდევ უფრო სწრაფი ტემპი და განმეორებითი ტურისტი გვეყოლება თუ პოლიტიკურ სიმშვიდეს შევინარჩუნებთ და ინტენსიურად გავყვებით არსებული და ახალი ავიაბაზრების განვითარების გეგმას", - აცხადებს ავიაციის სექტორის წარმომადგენელი თამუნა თანდაშვილი.
შეგახსენებთ, რომ 2019 წლის ოქტომბრის პერიოდის მონაცემებით, საქართველოში 782 670 საერთაშორისო მოგზაურთა ვიზიტი შედგა, რაც წინა წლის ანალოგიურ მაჩვენებელს 8.8%-ით აღემატება. საერთაშორისო ვიზიტორთა განხორციელებული ვიზიტების რაოდენობამ 665 055 შეადგინა, რაც 8.8%-ით მეტია 2018 წლის მაჩვენებელზე, ხოლო ტურისტული ვიზიტების რაოდენობა 438 805-ს გაუტოლდა, რაც 2018 წლის მაჩვენებელს 7.8%-ით აღემატება.
რაც შეეხება 2019 წლის იანვარ-ოქტომბრის მაჩვენებელს, 10 თვეში საერთაშორისო მოგზაურების ვიზიტებმა საქართველოში პირველად ისტორიულ 8 მილიონს გადააჭარბა და 8 020 230 შეადგინა. ზრდა წინა წლის ანალოგიურ პერიოდთან შედარებით 6.8%-ია.
საერთაშორისო ვიზიტორთა მიერ განხორციელებული ვიზიტების რაოდენობამ 6 647 866 შეადგინა (ზრდა 6.2%-ია), ხოლო ტურისტული ვიზიტების რაოდენობამ - 4 429 601 (ზრდა 6%).
2019 წლის ოქტომბრის მონაცემებით, საქართველოში რუსეთიდან 118 252 საერთაშორისო ვიზიტი შედგა, რაც 21 114 ვიზიტით ანუ 15.2%-ით ნაკლებია 2018 წლის ანალოგიურ მაჩვენებელზე. მათ შორის, ტურისტული ვიზიტის რაოდენობამ 79 477 შეადგინა, რაც 28 170 ვიზიტით ანუ 26.2%-ით ნაკლებია 2018 წლის შესაბამის მაჩვენებელზე.
რაც შეეხება 2019 წლის 10 თვეს, ამ პერიოდში რუსეთიდან ვიზიტორების ვიზიტების რაოდენობამ 1 324 226 შეადგინა, რაც 6%-ით აღემატება 2018 წლის მაჩვენებელს. მათ შორის, ტურისტული ვიზიტების რაოდენობამ 984 533 შეადგინა ანუ 1.9%-ით მეტი 2018 წელთან შედარებით.
მიუხედავად ბოლო თვეების განმავლობაში, ზრდის ტემპების გარკვეული შემცირებისა, ჯამში, ტურიზმის სფეროში დადებითი ტენდენციები შენარჩუნდა და ძლიერდება.
აღსანიშნავია, რომ რუსეთის მიერ საავიაციო შეზღუდვების დაწესების შემდეგ, საქართველოს მთავრობის ყოველდღიური სამუშაო იყო მინიმუმამდე დასულიყო ის ზარალი, რომელიც კერძო სექტორს და მთლიანად ქვეყანას მიადგა.
კერძოდ, ტურიზმის ეროვნულმა ადმინისტრაციამ აქტიური მარკეტინგული კამპანიები ჩაატარა აშშ-ში, ევროკავშირის ქვეყნებში, მათ შორის ბალტიისპირეთში, სპარსეთის ყურის ქვეყნებში, საუდის არაბეთში, ცენტრალური აზიის ქვეყნებში, უზბეკეთში, ყაზახეთში და სხვ. - იმ ქვეყნებში, სადაც საქართველოს როგორც საინტერესო ტურისტული მიმართულებისადმი ინტერესი მაღალია და ტურისტები გამოირჩევიან სწრაფი გადაწყვეტილების მიღებით.
ტურიზმის ეროვნულმა ადმინისტრაციამ აქტიურად იმუშავა, რათა ერთი ბაზრიდან მიღებული დანაკარგი მაქსიმალურად შევსებულიყო სხვა ტურისტული ბაზრებიდან ზრდით.
ტურიზმის ეროვნული ადმინისტრაცია აგრძელებს კამპანიებს ისრაელში, გერმანიაში, უკრაინაში, ქუვეითსა და პოლონეთში. საქართველოს შესახებ სარეკლამო კამპანია გრძელდება National Geographic-სა და Google-ზე.
CNN-ზე წლის ბოლომდე გრძელდება მასშტაბური კამპანია, რომელიც მოიცავს სატელევიზო რეკლამას, სპეციალურ რეპორტაჟებს და ონლაინგვერდებს. კამპანიის ფარგლებში CNN-ის პლატფორმაზე საქართველოს გვერდი “Discover Georgia” დამზადდა.
სარეკლამო კამპანიები ტარდება სხვა გავლენიანი საერთაშორისო მედიით და ონლაინპლატფორმებით. პარალელურად, ვმასპინძლობთ მსოფლიოში მაღალრეიტინგული მედიასაშუალებების ასობით წარმომადგენელს.
დეტალური სტატისტიკა ასეთია:
ევროკავშირის ქვეყნები:
• ესტონეთი +79.1%, საფრანგეთი +51.4%, გერმანია +43.6%, პოლონეთი +43%, გაერთიანებული სამეფო +31% და სხვა.
განსაკუთრებული ზრდა დაფიქსირდა შემდეგი ქვეყნებიდან:
• ყაზახეთი +139.4%, ყირგიზეთი +66.7%, ჩინეთი +58.9%, ისრაელი +56.9%, საუდის არაბეთი +44.9% და სხვა.
ყველაზე მეტი საერთაშორისო ვიზიტორი:
• სომხეთი (+12.7%), აზერბაიჯანი (+7.7%), რუსეთი (-15.2%) და თურქეთი (+16.9%) განხორციელდა.
