უკრაინის მართლმადიდბლური ეკლესიის ავტოკეფალიის აღიარების საპასუხოდ, მოსკოვისა და სრულიად რუსეთის პატრიარქი კირილე მეორე ალექსანდრიისა და სრულიად აფრიკის პატრიარქის თეოდორე მეორის ღვთისმსახურებისას მოხსენიებას შეწყვეტს.
აღნიშნულის შესახებ მოსკოვის საპატრიარქოს საგარეო ურთიერთობათა განყოფილების უფროსის მოადგილემ დეკანოზმა ბალაშოვმა განაცხადა.
"რუსეთის მართლმადიდებლურმა ეკლესიამ ღრმა მწუხარებით მიიღო ალექსანდრიის პატრიარქის თეოდორე II- ის გადაწყვეტილება, ეღიარებინა უკრაინის სქიზმატური მართლმადიდებლური ეკლესია და მისი მეთაური ეპიფანე ღვთისმსახურებისას მოეხსენიებინა", - უთხრა ბალაშოვმა რუსულ სააგენტო "რიას".
დეკანოზი ბალაშოვის თქმით, რუსეთის მართლმადიდებელი ეკლესია უპასუხოდ ვერ დატოვებს ალექსანდრიის პატრიარქის გადაწყვეტილებას.
"ეს გადაწყვეტილება შეუძლებელს ხდის ალექსანდრიის პატრიარქის დიპტიქში მოხსენიებას რუსეთის მართლმადიდებლურ ეკლესიაში პატრიარქალური მსახურების დროს”, - თქვა მან.
გარდა ამისა, დეკანოზმა ბალაშოვმა დასძინა, რომ რუსეთს ეკლესიის წმინდა სინოდი მიიღებს დამატებით გადაწყვეტილებას აღნიშნულთან დაკავშირებით.
შეგახსენებთ, უკრაინული მედიის ინფორმაციით, ალექსანდრიის პატრიარქმა თეოდორე მეორემ უკრაინის მართლამადიდებლური ეკლესიის საჭეთმპყრობელი ეპიფანე წირვისას მოიხსენია, რაც პრაქტიკულად უკრაინის ეკლესიის ავტოკეფალიის აღიარებას ნიშნავს.
ვრცელდება ვიდეოჩანაწერი, სადაც ჩანს, რომ ღვთისმსახურებისას პატრიარქი თეოდორე მეორე უკრაინის ეკლესიის მეთაურს მოიხსენიებს, როგორც ეპიფანე კიეველი.
ალექსანდრიისა და სრულიად აფრიკის საპატრიარქო ტახტი პირველია უძველეს მართლმადიდებლურ საყდრებს შორის [კონსტანტინოპოლის შემდეგ], რომლის მწყემსმთავარმაც უკრაინის მართლმადიდებლურ ეკლესიასთან ევქარისტიული კავშირი დაამყარა, მოიხსენია რა მისი მეთაური საეკლესიო დიპტიქში.
ალექსანდრიის საპატრიარქო მეორე ადგილს იკავებს მართლმადიდებელი ეკლესიების დიპტიქში.
აღსანიშნავია, რომ ბევრმა ადგილობრივმა ეკლესიამ უკრაინის ეკლესიის ავტოკეფალიის ცნობასთან დაკავშირებით განაცხადა, რომ ისინი დაელოდებიან რა გადაწყვეტილებას მიიღებენ უძველესი საპატრიარქო საყდრები და მას შემდეგ მიიღებენ თავის გადაწყვეტილებას.