2020 წლიდან იტალია გახდება პირველი ქვეყანა, სადაც სკოლებში კლიმატის ცვლილებების შესახებ კურსის შესწავლა სავალდებულო გახდება. აღნიშნულის შესახებ იტალიის განათლების მინისტრმა ლორენცო ფიორამონტიმ განაცხადა.
როგორც განათლების მინისტრმა გადაწყვეტილების გამოცხადებამდე განუცხადა სააგენტო "როიტერსს", კლიმატის ცვლილებების შესახებ კურსი ერთი სასწავლო წლის განმავლობაში 33 საათს მოიცავს, რაც დაახლოებით კვირაში 1 საათს შეადგენს.
"მინდა, იტალია გახდეს პირველი ქვეყანა, რომელიც განათლების სისტემაში გააერთიანებს გარემოსა და საზოგადოებას", - დასძინა ფიორამონტიმ.
გადაწყვეტილება 2020 წლის სექტემბრიდან შევა ძალაში და ის გავრცელდება იტალიის ტერიტორიაზე მოქმედ ყველა სკოლაზე.
განათლების მინისტრის თქმით, ის ასევე გაკვეთილების გაცდენის ნებას დართავს, გრეტა თუნბერგის მიერ ორგანიზებული "პარასკევის პროტესტით" შთაგონებულ, სკოლის მოსწავლეებს.
16 წლის გრეტა ტუნბერგი უკვე წელიწადზე მეტია აქტიურ გარემოსდაცვით კამპანიას ეწევა თავის მეგობრებთან ერთად. მისი ყოველკვირეული პროტესტი, როდესაც უარი თქვა პარასკევობით სკოლაში მისვლაზე სანამ შვედეთის ხელისუფლება არ შეასრულებდა პარიზის კლიმატის შეთანხმებით ნაკისრ ვალდებულებებს, ცოტა ხანში გლობალურ გარემოსდაცვით მოძრაობაში გადაიზარდა, რომელსაც ასი ათასობით ადამიანი შეუერთდა მსოფლიოს მასშტაბით.