საპატრიარქო კატეგორიულად მიუღებლად მიიჩნევს არქიმანდრიტ ბართლომეს კომენტარს, რომელიც მან მსოფლიოში აღიარებული ქართველი მეცო-სოპრანოს ანიტა რაჭველიშვილის მისამართით გამოიყენა. შესაბამის განცხადებას საქართველოს საპატრიარქოს საზოგადოებასთან ურთიერთობის სამსახური ავრცელებს.
"ვეხმაურებით აღიარებული მეცო-სოპრანოს, ქ-ნ ანიტა რაჭველიშვილის მიერ facebook სივრცეში გამოქვეყნებულ სტატუსს, რომელიც სასულიერო პირის, არქიმანდრიტ ბართლომე ფირცხალაშვილის, მიერ მის მიმართ გამოთქმულ კომენტარს ეხება და რომლმაც საზოგადოების გაღიზიანება გამოიწვია.
კატეგორიულად მიუღებელია, ეკლესიის წარმომადგენლის ენა იყოს აგრესიული და სხვისთვის ბოროტის მსურველი.
მსგავსი გადაცდომების განხილვა ხდება შესაბამის კომისიაზე, ეს ფაქტიც უახლოეს პერიოდში განხილული იქნება და მოჰყვება შესაბამისი რეაგირება.
ასევე, გვინდა გამოვხატოთ ჩვენი პატივისცემა ქალბატონი ანიტა რაჭველიშვილის შემოქმედების მიმართ, ვუსურვებთ მას ჯანმრთელობასა და შემდგომ წარმატებებს მსოფლიოს დიდ სცენაზე", - ნათქვამია განცხადებაში.
"რაჭველიშვილს ყელის კიბო უშველის" - დაწერა არქიმანდრიტმა ბართლომემ ანიტა რაჭველიშვილის მისამართით, მას შემდეგ რაც რაჭველიშვილმა გააკრიტიკა ბერა ივანიშვილი ამაზონის ტყეების აღსადგენად 1.1 მლნ დოლარის გადარიცხვის გამო.
