მთავრობამ ფინანსთა სამინისტროს ინციატივას ბუღალტრული აღრიცხვის-ანგარიშგებისა და აუდიტის შესახებ საქართველოს კანონში ცვლილებების შეტანის შესახებ მხარი დაუჭირა. აღნიშნულთან დაკავშირებით, ფინანსთა მინისტრმა, ივანე მაჭავარიანმა გააკეთა განმარტება.
„კანონის მიხედვით ყველა კომპანიას საქართველოში პირველი ოქტომბრისთვის ევალებოდა, მოეხდინა გასული წლის 31 დეკემბრის მდგომარეობით თავიანთი ანგარიშგების წარდგენა იმ სტანდარტის მიხედვით, რომელიც დააწესა აუდიტის ზედამხედველობის ორგანომ. ჩვენ კომპანიები გვქონდა დაყოფილი ოთხ კატეგორიად და მეოთხე კატეგორიაში, სადაც დაახლოებით 60 ათასამდე კომპანია შედის, როგორც პატარა, მიკრობიზნესი, მათაც უჭირდათ პირველი ოქტომბრისთვის ამ ანგარიშგების წარდგენა და არ წარდგენის შემთხვევაში, ჯარიმა არის 500 ლარი“, – განაცხადა მაჭავარიანმა.
მეოთხე კატეგორიას მიეკუთვნება სუბიექტი, რომლის მაჩვენებლები საანგარიშგებო პერიოდის ბოლოს სამი კრიტერიუმიდან, სულ მცირე, ორ კრიტერიუმს აკმაყოფილებს: აქტივების ჯამური ღირებულება 1 მილიონ ლარს არ აღემატება; შემოსავალი 2 მილიონ ლარს არ აღემატება; საანგარიშგებო პერიოდში დასაქმებულთა საშუალო რაოდენობა 10-ს არ აღემატება.
მისი თქმით, ფინანსთა სამინისტრომ გაითვალისწინა, რომ ზოგიერთ კომპანიას არ აქვს ადამიანური რესურსი ამ ხარისხის ანგარიშგება ჰქონდეს, ასევე ზოგს არ აქვს კომპიუტერული სისტემები.
„აქედან გამომდინარე, მივიღეთ გადაწყვეტილება და საქართველოს მთავრობამაც მხარი დაუჭირა ორი წლით გადავუვადოთ ეს მოთხოვნა. შესაბამისად, 2020 წლის 31 დეკემბრის მდგომარეობით მოუწევთ ანგარიშგების წარდგენა 2021 წელს“, – განაცხადა მინისტრმა და აღნიშნა, რომ ორი წელი საკმარის დროა, რომ დაეწიონ ამ მოთხოვნებს“, – განაცხადა ივანე მაჭავარიანმა.
