ჩემთვის დიდი პატივია მოგმართოთ, როგორც საქართველოს პრეზიდენტმა. საქართველო პატარა ქვეყანაა ევროპის კიდეზე, რომელმაც გასული 28 წლის განმავლობაში საკმაოდ დიდი რაოდენობით შოკი მიიღო და ცვლილებები განიცადა, აღადგინა დამოუკიდებლობა, გახსნა საზღვრები, გადავიდა საბაზრო ეკონომიკაზე, გაუძლო ღია და გაჭიანურებულ კონფლიქტებს, ომსა და ოკუპაციას, - ასე დაიწყო გაერო-ს გენერალური ასამბლეის 74-ე სესიაზე გამოსვლა საქართველოს პრეზიდენტმა, სალომე ზურაბიშვილმა.
მისი თქმით, საქართველო მცირერიცხოვანი ერია, მაგრამ სოლიდარობის მნიშვნელობა "კარგად გვესმის".
"ჩვენი ადგილმდებარეობის გათვალისწინებით, ვიცით, რომ რეგიონის განუყოფელ ნაწილს წარმოვადგენთ, სადაც მშვიდობის გარეშე გლობალური სირთულეების გადალახვა შეუძლებელია. ასევე, კარგად გვესმის, რომ ჩვენი პლანეტის ხვედრი, ჩვენი ხვედრია. საქართველო, ისევე როგორც ყველა აქ წარმოდგენილი ქვეყანა, აწყდება საერთო გლობალურ სირთულეებს, რაც დღევანდელი სამყაროსთვის მნიშვნელოვან გამოწვევას წარმოადგენს - ეს არის კლიმატის ცვლილება, ბიომრავალფეროვნების მდგომარეობის გაუარესება, საყოველთაო და ხელმისაწვდომი ჯანდაცვა, თითოეული მოქალაქისთვის განათლების მიღების შესაძლებლობა, სიღარიბის, უმუშევრობისა და სხვადასხვაგვარი უთანასწორობის დაძლევა", - თქვა ზურაბიშვილმა და აღნიშნა, რომ გლობალური გამოწვევების დაძლევა მხოლოდ მაშინ არის შესაძლებელი, თუ მათ აღვიქვამთ და "ვეკიდებით, როგორც ერთიან მოვლენას, კომპლექსურ მრავალწახნაგოვან საფრთხეს".
მისივე თქმით, საქართველო ძალისხმევას არ დაიშურებს 2030 წლის მიზნების მისაღწევად.
"როცა ვუყურებთ 2030 წლისთვის გამოცხადებულ ჩვენს მიზნებს, მის მისაღწევად ბევრ რამ უნდა დავძლიოთ. უნდა განვახორციელოთ სხვადასხვა ინიციატივები, რაც მსოფლიოსთვის არის აქტუალური, ასევე აქტუალურია საქართველოთვის", - თქვა ზურაბიშვილმა.
