"საზოგადოების სრულყოფილად ინფორმირების მიზნით, ვასაჯაროვებთ აჭარის მთავრობის აპარატის 2010-2019 წლების წარმომადგენლობითი ხარჯების ამსახველ ოფიციალურ მონაცემებს", - შესაბამის განცხადებას აჭარის მთავრობა ავრცელებს.
აჭარის ა/რ მთავრობის ინფორმაციით, ცხრილში მითითებული მონაცემების თანახმად, წინა ხელისუფლების პირობებში, წარმომადგენლობითი ხარჯების ტენდენცია იყო ყოველწლიურად მზარდი:
2010 წელი - 445 730 ლარი
2011 წელი - 517 947 ლარი
2012 წელი - 771 347 ლარი
მათივე ინფორმაციით, "ქართული ოცნების" მმართველობის პერიოდში, ოფიციალური მონაცემების თანახმად, ფიქსირდება წარმომადგენლობითი ხარჯების კლების ტენდენცია:
2017 წელი - 154 313 ლარი
2018 წელი - 109 189 ლარი
2019 წელი ( 8 თვე) -- 87 122 ლარი
"აღსანიშნავია, რომ წელს აჭარამ აღმოსავლეთ პარტნიორობის საინვესტიციო ფორუმს და კონფერენციას - "საქართველოს ევროპული გზა" უმასპინძლა. წარმომადგენლობითი ხარჯები ასევე გათვალისწინებულია ორი მაღალი დონის საერთაშორისო ფორუმისთვის, რაც მაღალი რანგის პოლიტიკოსების მონაწილეობით აჭარაში წლის ბოლომდე უნდა მოეწყოს", - ნათქვამია აჭარის ა/რ მთავრობის მიერ გავრცელებულ განცხადებაში.
"თითოეული საბიუჯეტო ლარი, თითოეული თეთრი იხარჯება მიზნობრივად და ბოლომდე ხმარდება ჩვენი მოქალაქეების კეთილდღეობას, მათი ჯანმრთელობისა და სოციალურ საკითხებს. განსხვავებით ძველი პრაქტიკისგან - როცა საბიუჯეტო სახსრებით ხდებოდა ძვირადღირებული პიჯაკების, ასევე ძვირფასი საჩუქრების შეძენა ნაცნობ-მეგობრებისთვის.
გასულ წლებთან შედარებით, ჩვენ ორჯერ გავზარდეთ რესპუბლიკური ბიუჯეტი, ხოლო მილიონი ლარით შევამცირეთ ადმინისტრაციული ხარჯი მთავრობის აპარატში, რაც 2012 წელთან შედარებით 5-ჯერ ნაკლებია. ვერც მთავრობის თავმჯდომარე და ვერცერთი თანამდებობის პირი ვერ იქნება ფუფუნებაში" - განმარტავს აჭარის მთავრობის თავმჯდომარე.
"წარმომადგენლობითი ხარჯების დაკავშირება პირდაპირ უცხოურ ინვესტიციებთან არარელევანტურია, თუმცა უნდა აღინიშნოს რომ 2019 წლის I კვარტალში აჭარის რეგიონში განხორციელებული პირდაპირი უცხოური ინვესტიციების მოცულობამ შეადგინა 26.1 მლნ აშშ დოლარი, რაც წინა წლის ანალოგიურ მაჩვენებელთან მიმართებაში გაზრდილია 209%-ით.
აღნიშვნის ღირსია ის გარემოება, რომ ბოლო ერთი წლის განმავლობაში აჭარაში 1 მილიარდი ლარის ღირებულების საინვესტიციო პროექტები განახლდა", - აღნიშნულია მთავრობის განცხადებაში.