გვაქვს რუსულ ანტიდასავლურ პროპაგანდასთან დაკავშირებული გამოწვევები, - ამის შესახებ საქართველოს პარლამენტის თავმჯდომარე ირაკლი კობახიძემ საერთაშორისო კონფერენციაზე “მსოფლიო თავდაყირა-2018“ სიტყვით გამოსვლისას განაცხადა.
პარლამენტის თავმჯდომარის თქმით, პროპაგანდასთან საბრძოლველად, საქართველო უკრაინასთან და მოლდოვასთან ერთად, სტრატეგიული კომუნიკაციების ცენტრის დაფუძნებას გეგმავს.
„გვაქვს გამოწვევები, რომლებიც უკავშირდება რუსულ ანტიდასავლურ პროპაგანდას. რა თქმა უნდა, ჩვენ რეაგირება უნდა მოვახდინოთ ამ გამოწვევებზე. ჩვენ ვაპირებთ სხვადასხვა საკანონმდებლო ზომას მივმართოთ ამ მხრივ სიტუაციის გასაუმჯობესებლად. რა თქმა უნდა სიტუაცია უმჯობესდება და მე ვახსენე ამ კონტექსტში არჩევნების შედეგები, თუმცა ჩვენ ფრთხილად უნდა ვიყოთ და გამოვიყენოთ ახალი ინსტრუმენტები ამ მნიშვნელოვანი პრობლემის წინააღმდეგ. ბოლო დროს გვქონდა მოლაპარაკებები მოლდოველ და უკრაინელ მეგობრებთან. ჩვენ სტრატეგიული კომუნიკაციების ერთობლივი ცენტრის დაფუძნებას ვგეგმავთ, რომლის მთავარი მიზანი იქნება პროპაგანდის წინააღმდეგ ბრძოლა, ასევე მივმართავთ სტრატეგიული კომუნიკაციების სხვა ინსტრუმენტებს ამ გამოწვევებზე რეაგირებისთვის”,-განაცხადა ირაკლი კობახიძემ.
