საგამოძიებო კომისიამ იუსტიციის მინისტრის გამოკითხვა სხდომის დაწყებიდან რამდენიმე წუთში დაასრულა. როგორც აღმოჩნდა, კომისიის წევრებს მასთან კითხვები არ ჰქონდათ.
სხდომაზე თავდაპირველად განცხადება უმრავლესობის წარმომადგენლებმა, დიმიტრი ცქიტიშვილმა და სოფიო ქაცარავამ გააკეთეს და განაცხადეს, რომ ისინი კომისიაში თეა წულუკიანის დაბარების საჭიროებას ვერ ხედავენ და არც კითხვები ჰქონდათ.
ამის შემდეგ კი კომისიის თავმჯდომარემ, სერგი კაპანაძემ, ჰკითხა, ისევ იმ პოზიციაზე არის თუ არა, რომ ყოფილი მთავარი პროკურორი, ირაკლი შოთაძე არ უნდა გადამდგარიყო, რაზეც მან დადებითი პასუხი გასცა.
ამის საპასუხოდ კი სერგი კაპანაძემ განაცხადა, „მეტი კითხვა აღარ გვაქვს, თავისუფალი ხართ“ და სხდომა დასრულებულად გამოაცხადა.
შეგახსენებთ, რომ დღეს კომისიის ბოლო სხდომა გაიმართა, სადაც შს მინისტრი და ყოფილი მთავარი პროკურორი გამოკითხეს. ამის შემდეგ კომისია უკვე დასკვნის შემუშავების ეტაპზე გადადის.
