„ჯი-ეიჩ-ენ“-ის ინფორმაციით, პრეზიდენტი მარგველაშვილი არჩევნების თარიღის დასახელებას მიმდინარე კვირაში გეგმავს. არჩევნები კი, როგორც ჩანს, ოქტომბრის ბოლოს გაიმართება. უფრო ზუსტად კი, ჩვენი ინფორმაციით, საპრეზიდენტო არჩევნები 21 ოქტომბრისთვის დაინიშნება. თუმცა, როგორც ჩანს, მმართველ გუნდს თარიღი ჯერ გადაწყვეტილი არა აქვს და ჩვენი ინფორმაციით, პრეზიდენტსა და პრემიერს შორის ახლა მიდის იმაზე კონსულტაციები, 21 ოქტომბერი უფრო მეტად არის მისაღები „ქართული ოცნებისთვის“ თუ 28 ოქტომბერი.
არსებული კანონმდებლობით, პრეზიდენტი ნიშნავს არჩევნებს, მაგრამ მას პრემიერის თანხმობა ესაჭიროება და მარგველაშვილი ამიტომ ელოდება მმართველი გუნდის თანხმობას. თუმცა, გადაწყვეტილია, რომ ამ კვირაში 21 ან 28 ოქტომბერი, უფრო დიდი ალბათობით კი 21 ოქტომბერი დასახელდება. მოქმედი კონსტიტუციით, არჩევნები იმართება საპრეზიდენტო/საპარლამენტო/ადგილობრივი თვითმმართველობის ვადის ამოწურვის წლის ოქტომბერში. კონკრეტულ თარიღს კი ნიშნავს პრეზიდენტი, არჩევნების დღემდე არაუგვიანეს 60 დღისა.
