ოზურგეთის მუნიციპალიტეტის დაბა ურეკში აგრო-ტურისტული ფესტივალი „გურია 2018“ გაიმართა.
ფესტივალის მიზანს წარმოადგენდა ადგილობრივად წარმოებული სასოფლო-სამეურნეო პროდუქციის პოპულარიზაცია, ადგილობრივი სოფლის პროდუქციის და ტურისტული მომსახურების სერვისების მწარმოებლების ცნობადობის ამაღლება და მათი ხელშეწყობა პროდუქციის რეალიზაციასა თუ მომსახურების გაწევაში.
ფესტივალის ფარგლებში მოეწყო ადგილობრივად წარმოებული პროდუქციის გამოფენა-გაყიდვა, რომელშიც მონაწილეობა მიიღეს გურიის რეგიონის 50-ზე მეტმა ფერმერმა, მეწარმემ და კოოპერატივის წარმომადგენლებმა, რომლებიც აწარმოებენ თაფლს, ჩაის, ლურჯ მოცვს, მარწყვს, ნერგებს, ღვინოს, მინერალურ - ტკბილ სასმელებს და ა.შ.
ფესტივალში მონაწილეობისა და ქართული პროდუქციის წარმოებისათვის ყველა მონაწილეს „მადლობის სიგელი“ გადასცეს საქართველოს გარემოს დაცვისა და სოფლის მეურნეობის მინისტრის მოადგილემ სოლომონ პავლიაშვილმა, გურიის გუბერნატორმა მერაბ ჭანუყვაძემ და პროექტის დირექტორმა ნანა თავდუმაძემ.
პროექტს ახორციელებს ა(ა)იპ “ გურიის განვითარების კავშირი/Guria Development Union პროექტის „მონაწილეობითი CHARRETTE გურიის ტურიზმის განვითარების სტრატეგიისთვის“ ფარგლებში, რომელიც დაფინანსებულია საქართველოში ევროკავშირის დელეგაციის მიერ და რომელსაც ახორცილებს ოზურგეთის, ლანჩხუთისა და ჩოხატაურის მუნიციპალიტეტები ორ არასამთავრობო ორგანიზაციასთან ერთად: „სამოქალაქო საზოგადოების ინსტიტუტი“ და ა(ა)იპ „ინოვაციებისა და სამოქალაქო განვითარების ცენტრი პროგრესის სახლი". ღონისძიება ევროკავშირის მხარდაჭერით გაიმართა, გაეროს სურსათისა და სოფლის მეურნეობის ორგანიზაციასთან (FAo) თანამშრომლობით, სოფლისა და სოფლის მეურნეობის განვითარების ევროპის სამეზობლო პროგრამის (ENPARD) ფარგლებში. ფესტივალის ორგანიზატორი კი გახლავთ გარემოს დაცვისა და სოფლის მეურნეობის გურიის რეგიონული სამსახური.
