აშშ-ის თავდაცვის დეპარტამენტის ყველაზე მაღალი რანგის თანამშრომლებმაც კი ძალიან ცოტა, ან საერთოდ არაფერი იციან, თუ რა ეროვნული უსაფრთხოების მოლაპარაკებები იყო მიღწეული დონალდ ტრამპისა და პუტინის პირისპირ შეხვედრის დროს ჰელსინკში. წერს The Washington Post-ი.
გაზეთი აღნიშნავს, რომ პენტაგონს უჭირთ უპასუხოს ჟურნალისტების შეკითხვებს, თუ რა გავლენას მოახდენს ჰელსინკის სამიტი აშშ-ის საქმიანობაზე თავდაცვის სფეროში.
"ინფორმაციის ნაკლებობა ასახავს ადმინისტრაციულ ურთიერთობებში არსებულ ხარვეზებს" - წერს გაზეთი.
მისივე ცნობით, აშშ-ის თავდაცვის მინისრტრი ჯეიმს მეტისი არ ესწრებოდა აშშ-ის მინისტრთა კაბინეტის სხდომას. ასევე არ გამოჩენილა საზოგადოების წინაშე ამ კვირის მანძილზე და არც სამიტის შესახებ გაუკეთებია კომენტარი.
თეთრი სახლის პრესმდივანმა სარა სანდერსმა სამიტის შემდეგ ჩამოთვალა საკითხები, რომელსაც განიხილავდნენ პრეზიდენტები: „სირიის ჰუმანიტარული დახმარება, ირანის ბირთვული ამბიციები, ისრაელის უსაფრთხოება, ჩრდილოეთ კორეის დენუკლერიზაცია, უკრაინა და ყირიმის ოკუპაცია, რუსეთის ბირთვული არსენალის შემცირება აშშ-სა და რუსეთში და რა თქმა უნდა თქვენი საყვარელი თემა - რუსეთის ჩარევა ამერიკულ არჩევნებში“.
თუმცა, მას არ დაუკონკრეტებია რა გადაწყვეტილებები იქნა მიღებული ამ საკითხებთან დაკავშირებით.
