ჩაქვი-ქობულეთის დამაკავშირებელ გზაზე მომხდარი ავარიის შედეგად, სამი ადამიანი გარდაიცვალა, მათ შორის ორი მცირეწლოვანი ტყუპი და მათი 24 წლის მამა. ის ადგილზე გარდაიცვალა.
დაშავებული ჩვილები და დედა, მოქალაქემ დედათა და ბავშვთა ცენტრში მიიყვანა, თუმცა ბავშვები საავადმყოფოში შეყვანისთანავე გარდაიცვალნენ.
ტყუპების დედა კი ბათუმის რეფერალურ საავადმყოფოშია გადაყვანილი.
დაშავებულია კიდევ ერთი მოქალაქე, რომელიც სასწრაფო დახმარების ბრიგადამ ქობულეთის რეფერალურ საავადმყოფოში გადაიყვანა. ექიმების ინფორმაციით, ახალგაზრდა კაცს გულმკერდის დაჟეჟილობა აღენიშნება, მისი მდგომარეობა სტაბილურია და ექიმების დაკვირვების ქვეშ იმყოფება.
როგორც "ჯი-ეიჩ-ენს" შსს-ში განუცხადეს, მომხდართან დაკავშირებით, გამოძიება სსკ-ის 276-ე მუხლის მე-7 ნაწილით მიმდინარეობს, რაც ავტოსაგზაო შემთხვევისას წესების დარღვევას გულისხმობს, რამაც სიცოცხლის მოსპობა გამოიწვია.