ახლად დაფუძნებული უკრაინული ავიაკომპანია SkyUp-ი კიევი-ბათუმის მიმართულებით რეგულარული რეისების დაწყებას გეგმავს და ამ მიზნით ავიაკომპანიამ უკრაინის საავიაციო ხელისუფლებას ოფიციალურად უკვე მიმართა. თუმცა მანამდე ავიაკომპანია ბათუმის მიმართულებით ჩარტერულ ავიარეისს განახორციელებს.
საქართველო ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოში განმარტავენ, რომ მიმდინარე წლის 4 ივნისს, სამოქალაქო ავიაციის სააგენტომ, საქართველოსა და უკრაინას შორის საჰაერო მიმოსვლის შეთანხმების შესაბამისად, SkyUp-ის კიევი-ბათუმი-კიევის საჰაერო ხაზზე რეგულარულ გადამზიდველად დანიშვნის შესახებ, უკრაინის საავიაციო ხელისუფლებისგან წერილი მიიღო.
“ავიაკომპანიას სააგენტოსთვის რეგულარული ფრენების ნებართვის მისაღებად არ მოუმართავს. ავიაკომპანიამ ამ ეტაპზე, განაცხადი შემოიტანა მხოლოდ ერთ ჩარტერულ რეისზე (10 ივნისი)”, აცხადებენ სამოქალაქო ავიაციის სააგენტოში.
სამოქალაქო ავიაციის სააგენტოს სტატისტიკური ინფორმაციის მიხედვით 2017 წელს, წინა წელთან შედარებით, საქართველო-უკრანას შორის ავიამგზავრთნაკადი 14.6%-ით გაიზარდა. 2017 წელს საქართველო-უკრაინას შორის ავიამგზავრთნაკადმა 402 ათას 246 მგზავრი შეადგინა, 2016 წელს კი 351 ათას 23 მგზავრი. 2015 წლის სტატისტიკური მაჩვენებლებით - 269 ათას 290 მგზავრი.
შესაბამისად 2016 წელს 2015 წელთან შედარებით ზრდა 30%-ის დონეზე დაფიქსირდა.
2018 წლის 5 თვის მონაცემებით კი საქართველო-უკრაინას შორის საავიაციო მომსახურებით უკვე ისარგებლა 127 ათას 484 მგზავრმა. აღსანიშნავია, რომ საქართველო-უკრაინას შორის ამ დროისათვის რეგულარულ რეისებს FlyUIA, YANAIR-ი და Georgian Airways-ი ასრულებს.
შეგახსენებთ, რომ ავიაკომპანია SkyUp-მა პირველი ჩარტერული ავიარეისი, 19 მაისს კიევიდან შარლ ელ-შეიხის მიმართულებით უკვე განახორციელა. ავიაკომპანიის ინფორმაციით, აღნიშნულ მარშრუტზე ხომალდმა 100%-იანი დატვირთულობით იფრინა.
SkyUp-მა სამომავლოდ 5 ერთეულ Boeing 737 MAX-ზე გააკეთა შეკვეთა, რომლის ღირებულებაც 624 მლნ დოლარია.
შეკვეთა ორ ერთეულ Boeing 737 MAX 8-სა და სამ ერთეულ Boeing 737 MAX 10-ს მოიცავს, რომელსაც Boeing-ი დამკვეთს სიეტლის ქარხნიდან 2023 წლისთვის მიაწვდის.
ამ ეტაპისთვის ავიაკომპანია პარკი 2 ერთეულ Boeing 737-800-ს აერთიანებს. აღნიშნული მოდიფიკაციის თვითმფრინავებს შედარებით მცირე საოპერაციო ხარჯი გააჩნიათ, რაც საბოლოო ჯამში ავიაბილეთების ფასზეც ჰპოვებს ასახვას.
