საქართველოდან თურქეთის რესპუბლიკაში ორმხრივი არარეგულარული სამგზავრო გადაყვანის განხორციელება შესაძლებელია ნებართვის გარეშე. სახმელეთო ტრანსპორტის სააგენტოს ინფორმაციით, თურქეთ - საქართველოს შორის ორმხრივი არარეგულარული („მგზავრების გადაყვანა დახურული კარით“ ან „მაქოსებური რეისით“) სამგზავრო გადაყვანები განთავისუფლებულია ნებართვებისაგან.
„მიუხედავად ამისა, გაუგებრობის თავიდან აცილების მიზნით, გადაყვანის განხორციელებისას თან იქონიეთ ტრანსპორტის მინისტრთა ევროპის კონფერენციის 1995 წლის 7-8 ივნისის #95/2 რეზოლუციით ECMT/CM(95) 3 FINAL „ავტობუსით მგზავრთა საერთაშორისო გადაყვანების შესახებ“ განსაზღვრული საკონტროლო დოკუმენტი (ასლი თან ერთვის)”, მოუწოდებს სააგენტო თურქეთში არარეგულარული სამგზავრო გადაყვანების განმხორციელებელ გადამზიდავებს.
იმავდროულად, ავტობუსი, რომლითაც განხორციელდება მგზავრთა გადაყვანა (თურქული კანონმდებლობით) არ უნდა იყოს 20 წელზე მეტი ხნოვანების და აღჭურვილი უნდა იყოს ტაქოგრაფით (ევროპის შეთანხმება „საერთაშორიო საავტომობილო მიმოსვლის მწარმოებელი სატრანსპორტო საშუალებების ეკიპაჟების მუშაობის შესახებ“ - AETR) და სიჩქარის შემზღუდველი მოწყობილობით („ერთის მხრივ საქართველოსა და მეორეს მხრივ, ევროკავშირს და ევროპის ატომური ენერგიის გაერთიანებას და მათ წევრ სახელმწიფოებს შორის ასოცირების შესახებ შეთანხმება“).
