პოლიტიკური გაერთიანება „ახალი მემარჯვენეები" აცხადებს, რომ ბოლო პერიოდში იუმორისტული შოუს სახე მიიღო საქართველოს ეკონომიკური განვითარების ახალ მინისტრთან - ვერა ქობალიასთან დაკავშირებულმა პერიპეტიებმა. "ახალი მემარჯვენეებიის" აზრით, ვერა ქობალიას და ეკონომიკის სამინისტროს საქმიანობა არასერიოზულ შთაბეჭდილებას ტოვებს. "მემარჯვენეები" ქვეყნის პრეზიდენტსა და პრემიერ-მინისტრს მოუწოდებენ, ეკონომიკისა და მდგრადი განვითარების სამინისტროს საქმიანობას მეტი პასუხისმგებლობით მოეკიდნონ. ამის შესახებ "მემარჯვენეების" მიერ გავრცელებულ განცხადებაშია ნათქვამი.
ვერა ქობალიამ "მემარჯვენეების" კრიტიკა დღეს წარდგენილი პროგრამის გამო დაიმსახურა, რომლის მიხედვითაც მისი კაბინეტის კარი ღია იქნება და მოქალაქეებს მინისტრთან საკუთარ პრობლემებზე საუბარი შეეძლებათ. ასევე, "მემარჯვენეები" ქობალიას პროექტის - "მინისტრი ერთი დღით" გამოც აკრიტიკებენ.
"კულმინაციური იყო მისი 30 ივლისის ბრიფინგი, რომელზეც, მან ქართულ საზოგადოებას ამცნო, რომ ეკონომიკის სამინისტრო სერიოზულ სიახლეებს სთავაზობს საზოგადოებას. საბოლოოდ ეს „სიახლე" აღმოჩნდა ის, რომ მისი კარი ღია იქნება ყველა მიმსვლელისთვის და კიდევ, კონკურსში გამარჯვებულ უფოსკლასელებს მისცემს საშუალებას ერთი დღით დაიკავონ ეკონომიკის მინისტრის სავარძელი და განახორციელონ თავიანთი იდეები", - ნათქვამია "მემარჯვენეების" განცხადებაში.
მათივე განცხადებით, ქობალიასთან დაკავშირებულ სრულ გაუგებრობას ემატება "ხელისუფლების მიერ კონტროლირებული სატელევიზიო მედიის" სრულიად არაადექვატური გამოხმაურება ამ მოვლენების მიმართ, რომლებიც თავიანთი მცდელობით, სერიოზული სახე მისცენ სამინისტროს და პირადად მინისტრის საქმიანობას, კიდევ უფრო გროტესკულ ელფერს აძლევენ ამ ყველაფერს.
"მემარჯვენეების" განცხადებით, საქართველოში საკმაოდ არიან ეკონომიკის დარგში სათანადო ცოდნის, გამოცდილების და კვალიფიკაციის ექსპერტ-სპეციალისტები, "რომელთათვის, თუ მთელი საზოგადოებისთვის არა, საკმაოდ შეურაცხმყოფელია დარგის მართვის მიმართ ასეთი არაკვალიფიციური დამოკიდებულება".
"ქვეყანაში არსებული მძიმე სოციალურ-ეკონომიკური მდგომარეობის და ეკონომიკის განვითარების წინაშე არსებული სერიოზული გამოწვევების ფონზე მიგვაჩნია, რომ სრულიად არასერიოზულ შთაბეჭდილებას ტოვებს სამინისტროს და მისი ახალგაზრდა მინისტრის საქმიანობა, რომელიც, როგორც ჩანს, თვითონ ვერ აცნობიერებს რაოდენ საკვანძო თანამდებობა უჭირავს ქვეყნის მთავრობაში. მოვითხოვთ ქვეყნის პრეზიდენტისგან, მთავრობისგან სერიოზულად მოეკიდონ იმ პასუხისმგებლობას, რომელიც მათ, როგორც ქვეყნის მმართველებს აკისრიათ და პატივი სცენ საზოგადოებას", - აღნიშნულია "მემარჯვენეების" განცხადებაში.
