ხორავას ქუჩის საქმის პროკურორი ზვიად ფხაკაძე ჟურნალისტებთან საუბარში კატეგორიულად უარყოფს, რომ დღეს გამოკითხულმა მოწმეებმა ჩვენება შეცვალეს.
„მოწმემ დეტალურად მიუთითა შემთხვევის ადგილზე განვითარებული მოვლენები. დეტალურად აღწერა თუ რა ვითარებაში ხდებოდა კონფლიქტი, ვის და ვის შორის და ასევე მიუთითა იმ ფაქტობრივ გარემოებებზე, რომელიც ერთი-ერთი ბრალდებულის მიმართ ბრალად შერაცხული ქმედების ჩადენას ადასტურებს. ინფორმაცია იმის შესახებ, რომ მოწმემ ჩვენება რადიკალურად შეცვალა აბსოლუტური სიცრუეა. მოწმემ ისაუბრა მის მიერ გამოძიებაში მიცემული ჩვენებებში ასახულ დეტალებზე. მისი გამოკითხვისას გარკვეული დეტალების დაზუსტება მოხდა. ეს ბუნებრივი პროცესია, რადგან გამოძიების ეტაპზე მოწმე მხოლოდ ერთი მხარის მიერ იკითხება. სასამართლოში კი მოწმის დაკითხვაში ორივე მხარე მონაწილეობს. შესაბამისად გაცილებით მეტი კითხვის დასმაც გვხვდება და მოწმის მხრიდანაც მეტი ინფორმაციის გაჟღერება. მკაფიოდ ვადასტურებ, მოწმის მხრიდან ჩვენების რადიკალურ შეცვლას ადგილი არ ჰქონია. თუ რამდენად სარწმუნოა და გასაზიარებელი აღნიშნული მოწმის ჩვენება, ეს სასამართოლოს გადასაწყვეტია მის მიერ გამოტანილ განაჩენში. ბრალდების მხარეს გვაქვს მოლოდინი, რომ აღნიშნული მოწმის ჩვენება საფუძვლად დაედება ბრალდებულთათვის ბრალად შერაცხული ქმედების თაობაზე გამამტყუნებელ განაჩენს“ - განაცხცადა ჟურნალისტებთან საქმის პროკურორმა ზვიად ფხაკაძემ.
დაცვის მხარის მოსაზრებას, რომ არასრულწლოვან მოწმეებს შესაძლოა კონკრეტული პირები ატრენინგებდნენ და ჩვენებას აწერინებდნენ, პროკურორი პასუხობს, რომ მსგავსი რამ მისთვის უცნობია.
„ნამდვილად მინდა ამ კითხვაზე გიპასუხოთ, მაგრამ დაცვის მხარე ტრენინგში რას გულისხმობს არ ვიცი. მე საჯარო სახელმწიფო მოხელე ვარ და მხოლოდ ფაქტობრივი გარემოებებიდან გამომდინარე გესაუბრებით. ვერ გიპასუხებთ დაცვის მხარე რა ტრენინგებზე საუბრობს, ვინ არის ტრენერი და ა.შ. ეს ინფორმაცია ნამდვილად პირველად მესმის თქვენგან“ - განაცხადა ზვიად ფხაკაძემ.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
