მარგველაშვილი მაგალითია იმისა, თუ როგორი არ უნდა იყოს ქვეყნის პრეზიდენტი, - ამის შესახებ საპარლამენტო უმრავლესობის წევრმა, დავით მათიკაშვილმა განაცხადა.
მისი თქმით, მარგველაშვილი მარგინალურ ფიგურად იქცა.
”ის უპატივცემულობას ავლენს ყველაფერი იმის მიმართ, რის გამოც ჩვენმა ერმა და საზოგადოებამ ნდობა გამოუცხადა „ქართულ ოცნებას“. უკვე წლებია ჩვენი ხელისუფლება, მისი ყველა შტო აღმასრულებელი, საკანონმდებლო და სასამართლო ხელისუფლება, აშენებს და ამყარებს სახელმწიფო ინსტიტუტებს. პროგრესს ხედავს მთელი ცივილიზებული მსოფლიო, რაც დასტურდება არაერთი რეიტინგით (რად ღირს თუნდაც ავტორიტეტული კვლევითი ცენტრის Heritage faundation-ის ბოლო დროინდელი კვლევა, რომლის შესაბამისად ქართული სასამართლო სისტემა, აღმოსავლეთ ევროპაში პირველ ადგილზეა ეფექტიანობის ინდექსით). მხოლოდ პრეზიდენტი ვერ, უფრო სწორად არ ხედავს ჩვენი სახელმწიფოს წარმატებას. ეს ყველაფერი უფრო ჰგავს მოქმედი პრეზიდენტის მცდელობას, საპრეზიდენტო ვადის გასვლამდე შეიქმნას ოპოზიციური იმიჯი, თუმცა, ვშიშობ აქაც გაწბილება ელის მარგველაშვილს და საზოგადოება აუცილებლად გახდება მისი ფიასკოს მოწმე”,- განაცხადა დავით მათიკაშვილმა.
