ბიზნესმენი ანზორ ქოქოლაძე ბიზნესის წარმატებისთვის სამართლიანი სასამართლოს როლსა და მნიშვნელობაზე საუბრობს. ბიზნესმენმა ახლადანიშნულ ბიზნესომბუდსმენს ამ მიმართულებით არსებული პრობლემების შესახებ სასტუმრო "რადისონ ბლუ ივერიაში" გამართულ შეხვედრაზე მიაწოდა ინფორმაცია და გარკვეული მზაობისკენ მოუწოდა.
ბიზნესმენი სამართალწარმოებაში არსებულ პრობლემებზე საუბრობს და მიათითებს, რომ ეს ხარვეზები არსებობს როგორც სახელმწიფო სტრუქტურებში ისე სასამართლოში.
„თქვენს წინაშე 2-3 მნიშვნელოვანი საკითხი იქნება. დაგხვდებათ პრობლემები, რომლებიც ძალიან რთულია და ეს არა მარტო თქვენი ინსტიტუტის, არამედ ქართული სახელმწიფოს გამოწვევაა.
თუ არ იქნება სამართლიანი სასამართლო ვერ შედგება სახელმწიფო და პრობლემების მთელი ჯაჭვი, რომელიც სხვადასხვა სტრუქტურასა თუ სხვადასხვა სფეროში წარმოიშვება ზუსტად აქედან მოდის.
ამის წინააღმდეგ მუდმივი ბრძოლააა საჭირო, რომ გარკვეულ შედეგს მივაღწიოთ. მართალია, ამ მიმართულებით ახალი პრობლემები ნაკლებია, რადგან თავისუფალი და ჯანსაღია ბიზნესგარემო, მაგრამ ბოლომდე ჯანსაღი გარემო ვერ იქნება თუ სამართლიანი სასამართლო არ იქნება. დღეს სასამართლოში პროცესები არის ძალიან გაწელილი ან ნდობა არის ძალიან დაბალი და ბრძოლას, ვფიქრობ, აქვს აზრი“, - განაცხადა ბიზნესმენმა.
ანზორ ქოქოლაძე იმედოვნებს, რომ ახლადდანიშნული ბიზნესომბუდსმენი წარმატებული იქნება და ის დარწმუნებულია ბიზნესომბუდსმენი პასუხისმგებნლობით მოეკიდება ამ საკითხებს.
ახლადდანიშნული ბიზნესომბუდსმენი ახალი სტატუსით ბიზნეს-სექტორის წარმომადგენლებს დღეს პირველად შეხვდა. როგორც ირაკლი ლექვინაძე ამბობს, მომავალი კვირა ბიზნესის სხვადასხვა მიმართულების წარმომადგენლებთან შეხვედრით დატვირთული იქნება. მისი თქმით, ამ ეტაპზე ყველაზე აქტიურად ორი პრობლემატური საკითხი არის გამოკვეთილი, ეს არის გაჭიანურებულო სასამართლო დავები და მცირე ბიზნესის საკითხები. მისივე ახსნით, ამ კატეგორიას უფრო ნაკლები ხელმისაწვდომობა აქვს გადაწყვეტილების მიმღებ პირებთან ვიდრე მსხვილს.
